The Forgiven ****

Drama.
Met Forest Whitaker, Eric Bana en Morné Visser.
Regisseur: Roland Joffé.
18TVG.

Waaroor gaan dit?

Soos die titel van die fliek aandui, gaan dit oor die krag van vergifnis, maar moenie ’n Long Walk to Freedom of Invictus verwag nie. Dié fliek is rou in geweld en veral taal.

Dit draai om die verhore van die Waarheids-en-versoeningskommissie (WVK), waarvan Tutu (Whitaker) die voorsitter was. Hy kry ’n brief van Piet Blomfeld (Bana), ’n geharde en haatgevulde ekslid van die Vlakplaasmoordeenheid, wat swart Suid-Afrikaners in die doodsnikke van apartheid gemartel en vermoor het.

Daarin vra hy kwytskelding vir wat hy gedoen het omdat dit polities gedrewe was. Wat ontvou, is ’n skokkende verhaal wat gegrond is op regte sake wat voor die WVK moes dien en hoe dit gewone Suid-Afrikaners geraak het.

Dis ’n moeilike fliek om te kyk, maar die ligpunte, veral die einde, sny soos ’n tweesnydende swaard deur al die veragtelikheid.

Al die Afrikaanse vloekwoorde waaraan jy kan dink asook die gewraakte k-woord word heeltyd na kykers geslinger, maar die eerlikheid daarvan laat jou telkens na jou asem snak.

Is dit goed?

Oorsese resensente is louwarm oor die fliek. Simon Abrams op Rogerebert.com gee dit geen sterre nie en noem dit ’n lelike, breinlose uittarting. Dis erg onregverdig.

Die spel van Eric Bana as Piet en Forest Whitaker as Tutu is ’n kragtoer.

Bana, ’n Australiër, kry die aksent amper perfek reg en sy uitspraak van Afrikaanse woorde is onberispelik. Sy aggressie is voelbaar.

Eric Bana, ’n Australiër, kry die aksent amper perfek reg en sy uitspraak van Afrikaanse woorde is onberispelik. Foto: Saban Films.

Die Amerikaner Whitaker (wat ’n Oscar gewen het vir sy rol as die Uganda-­diktator Idi Amin in 2006 se The Last King of Scotland) kry selfs die biskop se eiesoortige laggie reg en ook sy warmte en vredeliewendheid.

Maar dis die Suid-Afrikaanse akteurs wat skitter met hul emosievolle spel: Morné Visser as die polisieman Hansi Coetzee en Thandi Makhubele as mev. Morobe, wie se uitstorting van vergifnis voor die WVK roerend is.

Die Generations-ster Pamela Nomvete speel ook ’n geloofwaardige Leah, Tutu se vrou.

Dis duidelik die fliek het oor baie van die oorsese gehore se koppe gegaan omdat hulle nie regtig verstaan watter wonderwerk vergifnis in ons land was en is nie.

Met al die Afrikaans (wat nie altyd in onderskrifte reg vertaal word nie) gaan daar ook baie verlore vir kykers wat dit nie verstaan nie.

Dit sal interessant wees om te sien hoe plaaslike gehore daarop reageer.