Van ontbyt tot nagereg – hier's 8 smullekker resepte met eier

Deur Esther Malan

28 Augustus 2020

Uitgawe 3 September 2020

Foto's: Jacques Stander.

Met ’n dosyn eiers kan jy wonders verrig. Van ontbyt tot sakpas geregte en selfs snoepkos – ons wys jou hoe om lentekos aanmekaar te slaan met eiers as die sterbestanddeel.

GOEIE REDES OM EIERS TE EET

Eiers word beskou as die natuur se alles-in-een-kragkos. Dit is nie net maklik om te berei nie; dis bekostigbaar en propvol noodsaaklike voedingstowwe wat jou liggaam nodig het om sterk en gesond te bly.

Dié veelsydige bestanddeel kan maklik by enige maaltyd gevoeg word vir ekstra substansie. Dit kan net so geëet word of selfs as die sterbestanddeel in vele geregte gebruik word.

Volgens dieetriglyne kan ’n gesonde persoon tot sewe eiers per week eet. Dít is hoekom:

HART

Eiers is ’n uitstekende bron van omega-3-olies wat inflammasie beveg en noodsaaklik is vir ’n gesonde hart.

BENE EN SPIERE

Eiers is ’n goeie bron van hoëgehalteproteïene. Dit bevat die regte hoeveelheid en kombinasie aminosure en proteïene wat noodsaaklik is vir spierbou en sterk gebeentes.

CHOLESTEROLVLAKKE

Eiers verhoog nie bloedcholesterolvlakke nie. Eiers het deur die jare ’n slegte reputasie gekry oor hul hoë cholesterolinhoud, maar vele studies het bewys die vette in eiers dra eerder by tot ’n gesonde hart en verhoog nié bloedcholesterolvlakke nie.

Eiers bevat “goeie” cholesterol, wat help om die “slegte” cholesterol, wat tot hartsiektes kan lei, te beveg.

GESONDE OË

Eiers is ook goed vir jou oë. Die antioksidante en vitamien A in eiers dra by tot die gesondheid van jou oë.

HARE EN NAELS

Dit hou ook gesondheidsvoordele in vir jou hare en naels. Die kombinasie van voedingstowwe in eiers help om jou hare en naels gesond en sterk te hou.

GEWIGSBEHEER

Sluit eiers in jou dieet in om te help met gewigsbeheer – die proteïeninhoud in eiers verseker dat ’n mens vinniger én langer versadig voel.

Eiers het ’n baie lang raklewe. Om te bepaal of dit nog vars genoeg is om te gebruik, toets dit so: Sit die eier in ’n koppie water. As dit dryf, is dit nie meer vars nie.

KOOK JOU EIERS REG

’n Gekookte eier is ’n mak-like en vinnige manier om ’n hongerpyn te sus, maar vir baie is dit ’n kopseer om eiers presies reg te kook.

Ons maak dit vir jou maklik:

Sit die eiers in ’n kastrol met koue water en verhit oor matige hitte tot die water begin kook. Kook dan 1-5 min. na smaak volgens die gids hieronder.