'Elders'-aanbieder Erns Grundling gereed vir eerste marathon

akkreditasie
0:00
play article
Intekenare kan na hierdie artikel luister
Die joernalis en TV-aanbieder Erns Grundling (41) gaan hierdie naweek sy eerste marathon hardloop deur Sondag aan die Kaapstad-marathon deel te neem. Dit is ten bate van die Ithemba Foundation, wat bewusmaking skep vir depressie as ’n biologiese siekte en ook navorsing befonds in dié verband.

TWEEDE PROBEERSLAG

Erns, wat in Brooklyn in Kaapstad woon, vertel hy het eers behoorlik begin draf in 2015, toe hy al 35 jaar oud was.

“Dit was ná ek die Camino in Spanje gaan stap het en vir ’n slag fiks was en heelwat gewig afgeskud het. Ek het toe my eerste halfmarathon gedoen en dit baie geniet,” vertel hy aan Huisgenoot.

Erns en sy hond Suki na 'n 25 km draf op Bettiesba
Erns en sy hond Suki na 'n 25 km draf op Bettiesbaai. Foto: Verskaf

In 2016 het hy ingeskryf vir die Kaapstad-marathon, maar weens werskdruk en ’n gebrek aan dissipline, het hy nooit daardie jaar gehardloop nie. 

Toe dit vroeër vanjaar bekend raak dat die Kaapstad-marathon hopelik gaan plaasvind, het hy weer daaraan begin dink om in te skryf. “Ek oefen dikwels op my beste wanneer ek ’n spesifieke doel voor oë het,” sê Erns. 

VOORBEREIDING

Erns heeltemal flou by die Rooi Stoor Padstal na '
Erns heeltemal flou by die Rooi Stoor Padstal na 'n 21 km drafsessie in son en wind buite Elandsbaai. Foto: Verskaf

Hy het alreeds in Mei vanjaar begin voorberei om die 42,2 km in die Kaapstad-marathon kaf te draf. 

“Ek het begin met kort afstande draf, soos 5 km en 7 km, en dit stadigaan opgebou en afgewissel tot ek uiteindelik 30 km gedraf het sowat drie weke gelede. Dit is die verste wat ek nog ooit gedraf het,” sê hy. 

Erns na hy 15 km gedraf het op Bettiesbaai.
Erns na hy 15 km gedraf het op Bettiesbaai. Foto: Verskaf

Natuurlik het die staptogte wat hy in die verlede gedoen het vir die kykNET-reisprogram Elders gehelp met die voorbereiding vir sy eerste marathon laat Erns hoor. 

“Ek dink veral daardie lang stapdae op die Camino in Spanje het my voorberei op lang afstande en my die selfvertroue gegee dat ek dalk dieselfde sal kan doen wanneer ek draf,” sê hy.

’N SAAK NA AAN DIE HART

Erns vertel hy is vroeër vanjaar genader deur prof. Lizette Rabe, van die Universiteit Stellenbosch se Departement Joernalistiek, om te hoor of hy en sy vrou, Catharien, die Kaapstad-marathon sal hardloop ten bate van die Ithemba Foundation wat sy gestig het.

“Ons het dadelik ingestem, maar Catharien moes ongelukkig later onttrek weens ’n besering.” 

Erns en sy vrou, Catharien op Bettiesbaai. Sy sou
Erns en sy vrou, Catharien op Bettiesbaai. Sy sou die Kaapstad-marathon saam met hom gedraf het, maar het 'n besering. Foto: Verskaf

Psigiese gesondheid is ’n saak wat die Elders-aanbieder baie na aan die hart lê. “Ek stap self ’n lewenslange pad met depressie en wil baie graag ’n beskeie bydrae maak tot Ithemba se roeping.”

Hy het intussen ook lekker begin saamwerk met sy goeie vriend en skrywer, Dana Snyman. “Die Swarthond-projek, wat hy saam met Erna Oosthuizen aanpak, help ook om die stilte oor depressie te breek. Ek gaan Sondag draf met ’n Swarthond-hoed.”

Erns kry sy Swarthond-hoed by Dana Snyman op Yzerf
Erns kry sy Swarthond-hoed by Dana Snyman op Yzerfontein. Foto: Verskaf

Erns het tot dusver bietjie meer as R25 000 ingesamel en is hoopvol dat hy sy teiken van R42 200 (’n duisend rand per kilometer of R1 per meter) sal bereik. 

“Ek is baie dankbaar vir elke donasie wat inrol. Dit is vir my wonderlik om te sien hoe ruim mense se harte (en beursies) is en dat hulle geld skenk vir iets waarvoor hulle nie direk iets terug ontvang nie, maar wat ’n groot verskil in ander se lewens kan maak,” sê hy.

Kom neem deel aan die gesprek
Volg Huisgenoot op FacebookTwitterInstagram en TikTok, en teken gerus in op ons nuusbriewe.


Jongste uitgawe

2 Februarie 2023

Jongste uitgawe
Klik hier om te gaan na jóú biblioteek met jou tydskrifte en -koerante.
Begin lees