Die e-Nuus-leser en haar fotograafman, Cornél, het vroeër vandeesmaand hul tweede dogtertjie gehad. Leilana is op 8 Maart in die Life Flora-hospitaal in Roodepoort gebore.
“Dit bly maar net ’n onbegryplike wonderwerk om die mensie wat jy nog die vorige aand in jou maag voel skop het in jou arms vas te hou en die gesiggie te sien ná soveel maande van afwagting,” sê Daniëlla.
Cornél was daar met hul dogtertjie se geboorte en het die spesiale oomblik op kamera vasgevang. “Hy hou daarvan om oomblikke te dokumenteer; ek dink dit is deel van sy DNS.”
Ousus Simoné (2) het elke dag in die hospitaal kom kuier. “Sy neem haar rol ernstig op. Ons uitdaging gaan wees om dit in haar kop te kry dat sy nie alles kan doen wat sy dink sy kan doen nie,” sê Daniëlla. “Sy kan nie die baba optel en ronddra nie, maar sy kan help klere kies.”
