Haar verhaal kon maklik een van moedverloor gewees het. ’n Paar jaar gelede het sy so min hoop vir die lewe gehad dat sy selfs vir haar naasbestaandes ’n vaarwelnota op haar foon getik het.
Maar iets het haar laat deurdruk – en hier sit Lyntjie Jaars voor ons, ’n prentjie van vreugde in haar velskoene en bont baadjie. Haar lag is aansteeklik en in haar Namaaksent gesels sy die dag aan die brand.
Gegewe haar bruisende vreugde is dit g’n wonder sy skiet nou aan haar derde seisoen van die kykNET-geselsprogram Oppiestoep nie – dis vir kykers lekker om na haar te kyk. Sy is ook gereeld gasaanbieder van kykNET & Kie se Klop!, waar sy ’n veldaanbieder is.
