Dit klink half ongelooflik dat Marcel van Heerden ná sewe jaar nie meer deel van Suidooster se Ruiterbosch-gemeenskap gaan wees nie. Tog sal sy karakter altyd deel van hom bly, want albei het een groot spilpunt waarom hul lewe draai.
Met ons aankoms hier by die Red Sofa in Vredehoek – net om die draai van die akteur se woonplek – het Marcel ons eers aan sy metgesel voorgestel: “Dis nou Max, my hondemaat. As hy nie saamgaan nie, is hy nie gelukkig nie.”
Max het hom onder ons tafel tuisgemaak, want ’n “kykweer” na sy akteur-musikant-skrywer-baas se loopbaan van 47 jaar is g’n kortfliek nie. Oor sy vertrek uit Suidooster sê Marcel: “Dit was tyd vir nuwe rolle. Ek kan tog nie die res van my lewe dieselfde karakter speel nie.”
