Hulle paaie het in 2009 die eerste keer gekruis toe hulle deur ’n gemeenskaplike vriend aan mekaar voorgestel is.
“My eerste indruk van Cecil was dié van ’n stil, respekvolle jong man met ’n goeie sin vir humor. Sy eerste woorde aan my was: ‘Sjoe, jy is pragtig’. Ek het geglimlag en dankie gesê,” onthou Adrielle.
Hulle het daarna gereeld ure lank oor die foon gesels. “Ek het altyd gedink hierdie ou het seker baie lugtyd.”
Hy het haar later op ’n middageteafspraak gevra om sy meisie te word.
Ná nege jaar saam het Cecil op 4 Julie verlede jaar die jawoord gevra terwyl die son oor die Amakhala-wildreservaat naby die Addo Olifant Nasionale Park gesak het. Adrielle het op die dag niks vermoed nie.
