Noem dit dan maar ’n soort ironie dat die aktrise Angela Lansbury ook in die regte lewe met misdaad te doen gehad het.
Die aktrise, wat vandeesweek op 96 jaar oorlede is, het in die verlede onthul dat sy en haar gesin van Amerika na Ierland moes trek om haar dwelmverslaafde dogter uit die kloue van die moordenaar en kultusleier Charles Manson te kry.
In ’n 2014-onderhoud met die Daily Mail het Angela verduidelik hoe haar dogter, Deidre (nou 69), in die 1960's by ’n ongure groep betrokke geraak het wat gelei was deur die musikant wat eindelik ’n massamoordenaar geword het.
“Dit het met dagga begin, maar het oorgegaan na heroïen. Daar was faksies bo in die heuwels bokant Malibu wat toegewy was aan dodelike dinge. Dit maak my seer om dit te sê, maar Deidre was in ’n stadium betrokke by ’n groep onder leiding van Charles Manson.”
Haar dogter, het sy vertel, was een van talle jong mense wat “begeester” was met Manson. Hy is eindelik in Julie 1967 lewenslank tronk toe gestuur, en op 19 November 2017 is hy in die ouderdom van 83 jaar dood.
Haar seun, Anthony (nou 70), was terselfdertyd verslaaf aan kokaïen en heroïen.
Sy het besluit om saam met haar kinders en man, die oorlede Engelse akteur Peter Shaw, vanaf Los Angeles na Ierland te trek.
“Ek het vir Peter gesê: ‘Ons moet trek,’” het sy vertel.
“Ek het ’n huis in County Cork gekry. Ek was aangetrokke tot Ierland omdat dit my ma se geboorteland was, en dit was ook iewers waar my kinders nie aan slegte invloede blootgestel sou wees nie.”
Haar seun het eindelik die dwelmduiwel geklop en ’n akteur en regisseur geword en die regie van 68 episodes van Murder, She Wrote behartig. Deirdre het ook herstel en met die sjef Enzo Battarra getrou.
Hulle het saam ’n Italiaanse restaurant genaamd Enzo & Angela in Los Angeles geopen, maar dit het intussen gesluit. Angela, wat op 11 Oktober oorlede is, was ’n toegewyde ouma vir haar drie kleinkinders en vyf agterkleinkinders.
Bronne: Dailymail.co.uk, Hollywoodlife.com
