Seks met jou eks is altyd ’n slegte idee. Liefdespel is bedoel vir gelukkige en bestendige verhoudings tussen twee mense wat vir mekaar lief en op langtermyn tot mekaar verbind is. Seks wat niks beteken nie, bestaan nie werklik nie.
Dalk speel jy saam omdat jy onbewustelik op ’n versoening tussen julle hoop. Omdat jy nog tot hom aangetrokke voel, loop jy die gevaar dat dit jou hart kan breek, jou kwesbaar kan maak en misbruik laat voel.
Dit kan jou ook met verskeie seksueel oordraagbare siektes opsaal. Jy klim nie meer net met die mens wat jy geken het in die bed nie, maar ook met sy nuwe lewensgeskiedenis.
Sulke seks sonder enige verbintenis kan misverstande oor jul gevoelens laat ontstaan en tot teleurstelling en onnodige drama lei waardeur jul kinders ook geraak kan word.
Al het jy steeds gevoelens vir hom, het hy duidelik al met sy lewe aangegaan. Seks met sy eks is vir hom ’n bonus. Vermy plekke en geleenthede waar jy hom kan raakloop.
Sorg dat jy nie tuis is wanneer hy die kinders kom op- of aflaai vir besoeke nie. Hou die kontak tussen julle formeel en op skrif.