Vertroue is die beste wegspringblok vir enige verhouding, en joune is nou met hierdie leuen geskend. Die redes daarvoor kan veelvuldig wees. Dalk wou hy jou vertel wat hy gedink het jy graag wil hoor. Dalk het hy beplan om mettertyd eerlik daaroor te wees wanneer dit nie meer vir jou sou saak maak hoe oud hy is nie. Soms voel mans hulle moes al meer op ’n sekere ouderdom bereik het en dalk het hy nie aan sy eie verwagtinge voldoen nie.
Al glo talle mense die sêding dat ouderdom net ’n syfer is, is dit geen onskadelike wit leuentjie wat hy jou vertel het nie. ’n Mens se ouderdom is ook onlosmaaklik deel van jou identiteit.
Dit is belangrik dat jy hom vra waarom hy nie met jou oop kaarte gespeel het nie sodat jy kan kyk hoe hy reageer. Dalk sal hy kwaad wees en voel hy’s uitgevang, of paniekerig raak en ver­skonings aanbied. Neem sy rede asook sy reaksie in ag voor jy ’n besluit oor die toekoms van jul verhouding neem.
As hy verder betroubaar is, jou nie andersins teleurgestel het nie en hy sy leuen kan geregverdig, kan jy hom vra of julle op ’n nuwe, eer­liker grondslag jul verhouding weer ’n kans
kan gee.
Maar as jy heeltyd gaan wonder wat hy nog vir jou wegsteek, sal jy twee keer moet dink of jy die verhouding wil voortsit. ’n Verhouding wat sleg wegspring, kan momentum verloor omdat daar te veel vrae en te min antwoorde is.