Die blote feit dat jy na ’n ander, beter lewe hunker, is reeds ’n positiewe wegspringblok. Hoe vind ’n mens jou pad na geluk? Soms deur nie daarna te streef nie, maar eerder balans te probeer vind.
’n Liefdesteleurstelling bring ’n verlies aan vertroue in jouself en ander mee. Die pyn daarvan moet eers verwerk word voor jy weer vir die lewe sal kans sien. Emosionele pyn verdwyn nie vanself nie; dit verg doelgerigte werk.
As jy nie kans sien om jou hart teenoor ’n berader uit te praat nie, is daar steungroepe aanlyn waarby jy kan aansluit – dalk eers as waarnemer voor jy mettertyd aan die gesprekke wil deelneem.
Selfsorg is noodsaaklik om emosionele energie te herwin. Kyk dat jy reg eet, oefening kry en genoeg slaap. Sorg dat jy elke dag uit die huis kom en iets moois buite raaksien. Hou ’n dankbaarheidsdagboek.
Van hierdie tegnieke om weer harmonie en hoop te vind klink dalk kosmeties en soos ’n tydelike pleister op ’n wond. Sodra jy dit gereeld begin toepas, sal jy die emosionele energie kry om jou lewe se legkaart weer stukkie vir stukkie inmekaar te laat pas. Eers as jy moed skep, sal jy jou kan mo­tiveer om iets aan jou omstandighede te verander.
Stel dan praktiese, uitvoerbare doelwitte soos om finansieel onafhanklik te word sodat jy uit jou ouerhuis kan trek. Breek die hoofdoel in kleiner mikpunte op soos om ’n nuwe CV saam te stel of opsies vir heropleiding te ondersoek. Skryf dit neer met sperdatums daarby.
Pak ook elke dag ’n taak in jou ouerhuis waarvoor niemand anders kans sien nie. Maak jouself so nuttig dat jy ook daar weer jou regmatige plek kan inneem.