Selfs groot en gevestigde maatskappye word hard geslaan deur die ontwrigting en finansiële koste van vier tot 10 ure beurtkrag ’n dag. Maar vir klein sakelui is dit letterlik ’n daaglikse stryd om oorlewing.
Benewens die nimmereindigende noodplanne om hulle deure oop te hou, is daar skade aan elektriese toestelle weens kragstuwings, brandgevaar, grootskaalse wateronderbrekings – en misdadigers wat die beurtkragdonker uitbuit om met gemak toe te slaan.
Eskom maak verskonings, politici wys vingers, en volhoubare groenkrag bly ’n toekomsdroom. Intussen word gewone landsburgers by die dag meer desperaat – en is dreunende dieselkragopwekkers die eindelose klankbaan van ons land se ellende.
