Ry ’n mens in Ringstraat in die skilderagtige Overbergse buurt Railton, sal jy die bordjie by die ingang van nommer 62 sien: “Swellendam Shack Theatre”.
Hier, “aan die ander kant van die spoorlyn en die hoofpad”, soos die stigter en eienaar dit beskryf, sal jy dalk nie verwag om ’n teater tussen die woonhuise aan te tref nie, maar die bordjie hang al sedert 2020 daar.
En, vertel almal trots, die teater floreer danksy die hulp van die gemeenskap van Swellendam. Dié stukkie betowering hier op die dorp voel byna bonatuurlik.
