Vroeg in die nuwe jaar begin ek en my ma met ’n nuwe oggendroetine. ’n Paar keer per week gaan swem ons vroegdag voor werk in ’n getypoel by die see. Vir vars lug en oefening, maar ook vir sanity. Die yswater spoel skete en sorge weg – helende waters, noem my ma dit.
Iewers in Februarie sien ons hulle die eerste keer. Ma en Pa Kolgans, met hul ses opgepofde kuikens. Pa hou wag, ma pik-pik saam met die kleintjies na wie-weet-wat op die muurtjie teenaan die branders.
In die weke en maande daarna is hulle altyd daar – soms verestoffers op die rotse, soms ’n streep wat koers kies tussen die swemmers deur, soms saamgebondel op die sand.
