Felix het onlangs teen ’n reuse-luislang te staan gekom – en die kat moes waarskynlik meer as net een van daardie lewens inboet in die verbete stryd om oorlewing.
Wiekus Bester, Felix se eienaar, vertel dit was behoorlik ’n noue ontkoming toe die luislang die mannetjieskat op die plaas Uitkyk naby Mbombela beetgekry het.
Dit was Wiekus se seun, Wian, wat om hulp geskree het toe hy die makabare toneel op die plaas raakgeloop het: Daar lê Felix in die gras – styf vasgepen deur die glibberige gedierte.
