Huisgenoot het in Desember berig oor Michiel Combrinck wat verlede jaar in die ateljee op sy regterknie neergesak en ’n duidelik niksvermoedende Nadia gevra het om met hom te trou.
Die twee het op 7 Januarie by Nebo net buite Bloemfontein afgehaak. En vandag, byna drie maande ná daardie groot vraag regstreeks op radio, beskou hy homself steeds as die gelukkigste man in die wêreld, vertel Michiel.
“Ek wou destyds hê die hele wêreld moes weet ek het ware liefde gevind, en op hierdie manier kon die luisteraars en almal ook deel in my liefde vir haar,” sê hy. “Sy het glad nie geweet dat ek haar wou vra om te trou nie en ek was so gestres, want ek wou seker maak dat dié oomblik seepglad verloop.”
