Sy was geseën met die soort vriendin waarvoor baie vroue hulle skoene agterna sou gooi. Nie net het Fallon Edwards in Kirsty James ’n vriendin gehad by wie sy oor naweke aan huis kon kuier nie – soos susters – maar toe Fallon ’n ruk terug werkloos was, het Kirsty haar oor haar ontferm.
Volgens ’n kennis was dit Kirsty wat uit die goedheid van haar hart vir Fallon ’n pos by haar eie werkplek gekry het. Dit was Kirsty wat vir Fallon soggens by haar huis opgelaai het om seker te maak sy kom betyds op kantoor, en wat haar smiddae weer haar huis toe geneem het.
’n Mens sou dink dié soort band sou die grondslag van ’n lang, hegte vriendskap wees, maar iets ondenkbaar het tussen die twee vriendinne van Mosselbaai skeefgeloop. Kirsty was dié dag by haar lessenaar in die einste kantoor waar sy Fallon werk help kry het, vertel die mense wat haar ken. Fallon was ook in die omtrek.
