Drie dae ná sy ousus se skielike dood in die eilandparadys waar hulle saam met hul gesin vakansie gehou het, het hy destyds teen sonsondergang in sy pa se hotelkamer ingestap gekom – ’n bruingebrande seuntjie met ’n handdoek om sy lyf en rooigehuilde oë.
Marnuwico Vosloo (toe 11) het daardie middag alleen gaan swem in een van die swembaddens by die luukse Riu Creole-hotel op Mauritius waar sy gesin veronderstel was om ’n droomvakansie te hou.
Hy het op sy pa, Mike, se skoot gesit, sy kop in sy nek gedruk en hartverskeurend begin huil. Tussen die snikke deur het hy byna onhoorbaar vertel: “Ek het na die hemel opgekyk en gesien waar my sussie is. Sy mis ons . . .”
