Wêreld se vuilste man sterf maande nadat hy vir eerste keer bad

akkreditasie
0:00
play article
Intekenare kan na hierdie artikel luister
Die Irannese staatsmedia het bekendgemaak dat Amou Haji, bekend as die wêreld se vuilste man, in die ouderdom van 94 oorlede is.

Hy is verlede Sondag op die dorpie Dejgah in die suide van Iran dood. Amou het geglo dat as hy was, sou dit vir hom ongeluk bring en hy sou siek word.

Amou was onlangs opnuut in die nuus oor hy byna 68 jaar gelede laas gebad het. Sy leefstyl het mense so verstom dat wetenskaplikes hom besoek het om vas te stel hoe hy so lank geleef het sonder om ernstig siek te word. 

Hy het die kenners glo verstom met sy kennis oor die voor- en nadele van die Franse Rewolusie en die impak van die Russiese Rewolusie. 

Maar in die mediese toetse het die wetenskaplikes – waaronder ’n professor van parasitologie – bevind dat hy net een keer in sy lewe ’n asimptomatiese infeksie opgedoen het.

Boonop het Amou geleef van vuil water uit poeletjies en diere wat dood langs die pad gekry is. Sy gunsteling was glo vrot ystervark. Hy het ook pyp gerook gevul met dieremis. 

Plaaslike bronne sê dat ’n groep inwoners ’n paar maande gelede besluit het genoeg is genoeg, en het Amou toe in ’n bad gedruk. Dit is nie bekend wanneer hy siek geword het nie. 

Met Amou se afsterwe kan die titel van vuilste man ter wêreld nou na die Indiër Kailash Singh gaan. 

In 2011 het die Daily Mail berig dat die boorling van die heiligste stad Varanasi sedert 1974 nog glad nie gewas of sy hare gesny het nie.

’n Priester het na bewering gesê dat om nie te was of hare te sny nie, sou aan Kailash ’n seun en erfgenaam besorg. Ten tye van Daily Mail se destydse artikel het hy al 37 jaar lank nie gewas nie. 

Kaula, soos hy bekendstaan, was voorheen ’n skaapherder en het geglo in ’n vuurbad, waar hy elke aand dagga gerook, om ’n vuur gedans en tot die Hindoe-god Shiva gebid het. 

“Dis net soos om water te gebruik om te bad. ’n Vuurbad help om van al die kieme en infeksies in die liggaam ontslae te raak,” het hy destyds aan die Hindustan Times gesê. Sy vrou het toe vertel dat hy die hasepad kies elke keer as hulle hom wil bad. 

Bronne: The GuardianDaily Mail, Washington Examiner

Teken in op ons nuusbriewe
Kry die dag se sterkste stories, die week se lekkerste resepte, die maandelikse nuus oor modes, boeke, skoolsake en hartsake. Teken nou in! 


Jongste uitgawe

9 Februarie 2023

Jongste uitgawe
Klik hier om te gaan na jóú biblioteek met jou tydskrifte en -koerante.
Begin lees