book-icon Uitgawe 30 September 2021

Irriteer jou sensitiewe vel jou? Kenners gee raad

akkreditasie
0:00
play article
Intekenare kan na hierdie artikel luister
As jy ’n sensitiewe vel het, is jy nie alleen nie – dit is ’n toenemende probleem. Kenners verduidelik die redes en bied oplossings.

WERKLIK SENSITIEF

Wanneer jy aan die algemeenste velsorgkategorieë dink, kom die drietal normaal, olierig en droog waarskynlik by jou op. Maar in werklikheid is ’n werklik sensitiewe vel algemener as al die ander soorte, met 52% van vroue wat beweer hulle het die toesteand, sê dr. Kerryn Greive, bestuurder van wetenskaplike sake by die velsorgmaatskappy Ego Pharmaceuticals.

“Die definisie van ’n sensitiewe vel is wanneer dit op eksterne stimulusse, soos ’n produk, reageer op ’n manier waarvan jy nie hou nie, of dit nou rooiheid, prikkeling of branderigheid is,” sê Kerryn.

’n Sensitiewe vel word as geneties beskou en het ’n meer deurdringbare stratum corneum, of buitelaag. In leketaal laat dit meer deur. Dit is ook dan geen verrassing nie dat die aanbevole behandelings uiters eenvoudig is.

“Gebruik ’n seepvrye reiniger en ’n basiese bevogtiger wat gliserien of hoëgehalte-mineraalolies bevat,” sê Kerryn.

Oor die algemeen behoort jy veilig te wees as jy by reekse hou wat as geskik vir ’n sensitiewe vel gemerk is. Kies produkte wat min bestanddele bevat en ’n handelsnaam met ’n bewese agtergrond op hierdie gebied.

Sensitiewe vel
Ter illustrasie. Foto: Gallo Images/Getty Images

JOU VELSORGMANTRA: DINK EENVOUDIG SJIEK

Die chronies terugkerende veluitslag ekseem is aan die toeneem, veral onder vroue. Werk- en gesinstres kan ’n sneller vir die toestand wees. Die eerste teken van ekseem is jeuking, waarna dit in ’n uitslag kan oorgaan. Dus is voorkoming die beste behandeling.

“Vestig ’n waaksame instandhoudingsprogram,” sê die velsorgkenner Kerryn Greive.

“Dit behoort ’n seepvrye reiniger in te sluit en – by gebrek aan ’n beter woord – ’n neutrale bevogtiger. Vermy bowenal enige velsorgprodukte wat kleur of geur bevat.”

ROSIG . . . OF ROOSAKNEE?

Rooiheid is ’n algemene aanduiding van ’n sensitiewe vel, maar wanneer dit minder van ’n rosige gloed is maar eerder ’n brandende donkerrooi blos, het jy waarskynlik met roosaknee te doen. Dit tas vermoedelik tot 20% van die bevolking aan.

Dermatoloë merk op vroue van 30 tot 50 is die kwesbaarste, en die toestand neig ál jonger.

“Dit is buitengewoon algemeen en die frustrerende ding is ons ken steeds nie die oorsaak nie,” sê die dermatoloog en medeprofessor Greg Goodman. Maar ons ken wel die algemene snellers: uiterste temperature (saunas, stoomvertrekke), sterk gegeurde kos, alkohol, kafeïen, piesangs, dalk selfs jogurt en party kase.

Die algemeenste behandeling is om jou snellers te ken en dit te vermy.

Greg sê laser- en IPL (intens polsende lig) kan rooiheid uit die vel haal, terwyl rome en antibiotika die “knopperige, bulterige variëteit van roosaknee” doeltreffend kan behandel.

Volg steeds die hou-dit-eenvoudig-benadering vir velsorg by die huis en beproef ’n kalmerende serum wat spesifiek geformuleer is vir ’n gelaat wat tot rooiheid geneig is.

Die goeie nuus: “Ná ’n paar jaar sal roosaknee minder gereeld en minder ernstig word,” sê Greg.

Sensitiewe vel.
Ter illustrasie. Foto: Gallo Images/Getty Images

SENSITIEF VS. GESENSITISEER

Ons woon in ’n tyd van kitsoplossings, veral wat velsorg betref. Daar is ’n tyd en plek vir dinge soos laser, gesigafskilferings, hidroksisuur en retinoïed. Die probleem is baie van ons weet nie wanneer om op te hou nie.

“In die afgelope 10 jaar het ek ’n reusetoename in velsensitiwiteit weens die oorgebruik van ooraktiewe produkte gesien,” sê die spa- terapeut Angela Derks.

“Enigiets wat te veel lae vel verwyder, is nie ’n goeie langtermynstrategie nie. Dunner vel beteken die bloedtoevoer onder is sigbaarder, wat tot meer rooiheid lei, en jy het die vel se natuurlike beskermende laag afgestroop.”

Die oplossing: Beproef ’n velsorgweergawe van ’n gesondheidsafsondering.

“Pak al die sterk formulerings en skropmiddels weg en behandel jou vel met ’n sagwerkende, voedende reiniger saam met plantgegronde produkte wat geformuleer is om die irritasie en inflammasie te laat bedaar,” sê Isabel Martin, internasionale velsorgkenner vir Clarins.

“Dit kan ’n paar jaar neem om die vel te genees,” sê Angela, wat botanieryke versterkers en serums aanbeveel.

“Dit vervang die velolies wat jy verloor het en beskerm jou vel terwyl jou gesig genees en sy noodsaaklike immuniteitsfunksie herbou.”

TEENVEROUDERING: DIE SAGWERKENDE OPLOSSINGS

Net omdat jy ’n sensitiewe vel het, beteken nie jy kan nie teenveroudering trompop aanpak nie. As jy die teenveroudering-swaargewigte hidroksisuur en vitamien A wil beproef, gebruik ’n handelsnaam wat spesifiek op jou velsoort ingestel is.

Soek andersins ’n room wat op peptiedtegnologie (wat kollageenvervaardiging ’n hupstoot gee) of kalmerende antioksidante soos groentee of olyfblaar gegrond is. Baie handelsname verkoop nou gesigolies, wat wonderlik teenverouderend vir ’n sensitiewe vel is.

“Hul plantgegronde formulerings neig daarna om vir die vel vernuwend te wees en die masseerbewings wat jy vir aanwending gebruik, is voordelig,” sê Isabel Martin van Clarins.”

Dit bevat nie preserveermiddels nie”. Sonskerm is ’n moet, sê Kerryn Greive van Ego Pharmaceuticals. 

“80% van eksterne velveroudering word deur die son veroorsaak. ’n Sonskerm is voorkomend, maar dit behandel ook verouderde vel, want dit beskerm dit en gee die vel ’n kans om in herstelmodus te gaan.”

Sensitiewe vel
Ter illustrasie. Foto: Gallo Images/Getty Images

GESTRESTE VEL

In vandag se veeleisende wêreld kan selfs die beste vel oomblikke van ineenstorting beleef.

“Eksterne magte soos besoedeling, temperatuurveranderinge, humiditeit en allergene het almal ’n direkte uitwerking op die gehalte en vlekkeloosheid van die vel, sê die spa-terapeut Angela Derks.

“Die toestand van jou vel hang dikwels af van die klimaat waarin jy woon.”

Dit is nie goed as jy in ’n stad vol rookmis is nie, veral as jy kantoortemperatuur-ellende ook het.

“Binnenshuise verhitting, lugversorging, elektromagnetiese golwe en die algemene humiditeit en stres van die werklewe het alles ’n negatiewe uitwerking op die vel,” sê Angela.

Hoe ontgif ’n mens?

Angela beveel aan jy fokus op slaapgehalte (“ons hanteer stres soveel beter wanneer ons goed uitgerus is”) en asemhalingstegnieke (“om minstens van die gehalte in die lug te probeer vat en dit in ons lyf te benut”).

EKSTRA BRONNE: British Journal of Hospital Medicine, magonlinelibrary.com, webmd.com, healthline.com, familydoctor.org
Kom neem deel aan die gesprek
Volg Huisgenoot op FacebookTwitterInstagram en TikTok, en teken gerus in op ons nuusbriewe

Jongste uitgawe

2 Februarie 2023

Jongste uitgawe
Klik hier om te gaan na jóú biblioteek met jou tydskrifte en -koerante.
Begin lees