Dit het begin met ’n knobbel so groot soos ’n gholfbal aan die kant van haar nek. Maar die knop het haar nie gepla nie; daarom het sy dit geïgnoreer.
Rashida Croy van Kaapstad het in elk geval dringender dinge gehad om aan te dink. Haar man, Ebrahim, was baie siek weens die komplikasies van diabetes en sy moes dag en nag na hom omsien.
Toe Ebrahim (62) in Desember 2020 oorlede is, het haar kinders haar aangeraai om ’n dokter te laat kyk na die swelsel in haar nek, wat intussen nóg groter geword het.
