book-icon Uitgawe 17 September 2020

Sweet jou stres weg: HG se nuwe aanlyn oefenprogram wys jou hoe

akkreditasie
Wanneer jy baie gestres is, kan dit voel soos net nog ’n ding waaroor jy jou moet bekommer om tyd en energie te vind om oefening te doen.
Ter illustrasie. Foto: Gallo Images/Getty Images
Ter illustrasie. Foto: Gallo Images/Getty Images

Jy weet jy moet oefen om gesond te bly, maar jy kan eenvoudig nie die motivering daarvoor vind nie.

En dan voel jy sleg oor jou gebrek aan motivering en sak op die rusbank neer of hou jou besig met ander dinge . . . En so begin die siklus weer van voor af. Dalk moet jy dít probeer: Hou op wag tot jy lus voel om oefening te doen. Doen dit net.

Wat jou gesondheid betref, is fisieke inspanning en sweet een van die beste dinge wat jy kan doen om jouself beter te laat voel.

Studies wys oefening kan stres en verwante simptome aansienlik verminder. Dit klink dalk vreemd dat oefening – immers self ’n vorm van liggaamlike spanning – juis spanning verlig, maar dit is een van die beste maniere om dit te doen.

Al verhoog oefening aanvanklik die liggaam se stresrespons, verlaag gereelde oefensessies vlakke van die streshormone kortisol en epinefrien (adrenalien) in die liggaam.

Daarom strek die voordele van oefening verder as dat dit bloot jou fiksheid bevorder; dit sluit ook beter algehele welstand, verbeterde slaap en ’n kalmer verstand in.

In ’n studie oor die impak van oefening op sielkundige en emosionele welstand deur die Amerikaanse Sielkundevereniging noem die navorsers dit die “kaskade-effek” van gesondheidsvoordele en -gewoontes wat deur oefening aan die gang gesit word.

En ja, as jy eers begin oefen en beter voel, sal jy waarskynlik ook gesonder begin eet, meen hulle.

Ons is deesdae meer gespanne as ooit weens die uitdagings van die covid-19-pandemie en die inperking, asook die impak van dié onverwagte gebeure op ons wêreld. Maar gereelde oefening kán daarmee help.

Hier is ’n paar oefeninge wat jou sal help om sommer gou beter te voel.

AS JY ONGEFOKUS VOEL . . .

  • Beproef ’n instruktiewe oefenklas

’n Oefensessie waar jy aanwysings moet volg – soos ’n pilates- of zumbaklas of soortgelyke oefensessie waar jy ’n instrukteur het – verplig jou om te fokus op wat jy doen en neem jou gedagtes van jou bekommernisse weg. Jy moet heeltemal teenwoordig wees om jou bewegings te kan koördineer. Dit verhoog jou fokus – wat hopelik na die res van jou dag sal oorspoel. Kies ’n oefeningklas wat op jou behoeftes gegrond is.

Ter illustrasie. Foto: Gallo Images/Getty Images
Ter illustrasie. Foto: Gallo Images/Getty Images

“As jy met kernstabiliteit of rugprobleme sukkel, is pilates dikwels voordelig,” sê Chantel Nienaber, ’n persoonlike afrigter en drafinstrukteur van Stellenbosch. “Oorweeg ’n trap- of zumbaklas vir gewigsverlies en fiksheid. En vir spoed, ratsheid, krag en algemene kondisionering en definisie is ’n boks- of CrossFit-tipe-klas die beste.”

AS JY GEFRUSTREERD VOEL . . .

  • Beproef HIIT

As jy moet stoom afblaas, is hoë-intensiteit-intervaloefening (high-intensity interval training – HIIT) dalk wat jy benodig. Dié soort oefening wissel tussen sarsies intense oefening en tydperke van minder intense oefening of algehele rus. Dus beweeg jy van hoë inspanning na lae inspanning om te herstel en begin dan weer.

“As jy min tyd het en vinnig endorfiene wil vrystel, is HIIT wonderlik,” sê Chantel. “Dis belangrik om daarop te let dit is meer geskik vir die fikser mens wat minder geneig is tot beserings.”

HIIT is een van die eenvoudigste maniere om fiksheid te verbeter en te handhaaf, want dit verg nie toerusting nie. Tipiese oefeninge sal dinge soos spring, naellope en afsakspronge wees.

Nog ’n voordeel is dat jy dit enige plek kan doen – selfs jou sitkamer. Jy het nie noodwendig baie ruimte nodig nie, want jy kan die mengsel oefeninge aanpas om by jou situasie te pas.

AS JY ANGSTIG OF OORWELDIG VOEL . . .

  • Beproef joga

Stadige, meditatiewe beweging help verskuif jou liggaam van die veg-of-vlug-toestand – waarin jou simpatiese senustelsel paraat is – na die parasimpatiese senustelsel, wat ontspanning bevorder. Joga, met sy klem op die koördinering van verstand, liggaam en asemhaling, is ’n goeie voorbeeld hiervan.

“ ’n Belangrike deel van joga is dat jy jou asemhaling leer beheer,” sê Johannes de Villiers, eienaar van The Hot Yoga Studio in Stellenbosch. “Jy leer stadiger asemhaal wanneer jou hartklop versnel. Dis ’n goeie vaardigheid om te hê, want jy kan dit in enige stresvolle situasie toepas.”

Ter illustrasie. Foto: Gallo Images/Getty Images
Ter illustrasie. Foto: Gallo Images/Getty Images

Terwyl daar verskeie tipes joga is, sommige intensiewer as ander, is asemhalingswerk algemeen by almal.

Hatha-joga is stadig bewegend en help versterk en definieer spiere, sê Johannes.

In Vinyasa-joga beweeg jy deur ’n reeks posisies terwyl jy jou beweging met jou asemhaling sinchroniseer.  Iyengar-joga, wat by ouer mense gewild is, behels minder beweging en meer fokus op balans.

Bikram-joga, ook warm joga genoem, word in ’n verhitte vertrek beoefen en word aanbeveel vir mense wat ’n uitdaging soek.

5 minute: Die minimum hoeveelheid tyd wat aërobiese oefening neem om angstigheid te verminder

WENKE OM JOU TE HELP BEGIN

Vir baie mense is die grootste struikelblok om net aan die gang te kom. Hier is ’n paar wenke wat kan help. 

  • Vind wat vir jou werk. “Jy moet iets doen wat jou gelukkig maak, anders sal jy ná ’n ruk opgee,” sê Johannes.  “Om jouself te martel is nie volhoubaar nie.” Chantel stem saam. “Jy sal nooit vreugde in ’n aktiwiteit vind as jy dit doen om iemand anders tevrede te stel of omdat dit is wat iemand anders doen nie.”
  • Verbreed jou denke oor fisieke aktiwiteit. Draf en fietsry het hul plek, maar oefening kan enige aktiwiteit wees wat jou aan die beweeg kry en jou hartklop versnel soos dans, stap en trampolienspring.
  • Fokus op hoe oefening jou laat voel. ’n Doelwit soos gewig verloor kan ’n goeie motiveerder wees, maar die eintlike waarde van oefening sal waarskynlik eerder wees hoe goed dit jou lyf laat voel. 
  • Wees realisties oor jou vermoëns en fiksheidsvlak en kies aktiwiteite daarvolgens, sê Chantel.

HIER IS ’N PLAN WAT SAL HELP!

Hoe en waar begin jy as jy min tyd het vir oefen, altyd besig is en nie lus is om gim toe te gaan of geld het vir ’n gimlidmaatskap nie? Ons nuwe aanlyn oefenprogram, Huisgenoot Geen Gim!, bied die antwoord. Dit is ’n splinternuwe, bekostigbare aanlyn oefenplan wat jy maklik by jou eie huis kan volg. Jy betaal eenmalig vir die oefenplan, maar kan dit dan vir maande of jare tuis volg.

Besoek www.huisgenootgeengim.co.za om aan te sluit. Wanneer jy aansluit, gee dit jou toegang tot ’n volledige oefenplan wat intense weerstandgebaseerde oefeninge asook strekgebaseerde oefeninge en joga-oefeninge insluit.

Die program is verdeel in drie weke met verskillende oefensessies vir vyf dae van die week, en jy kan hierdie program oor en oor volg as jy dit verkies. Die plan sluit ook bykomende en ekstra oefensessies in waarmee jy dit kan aanpas. As jy verveeld raak of lus raak vir afwisseling, pas jy net jou program aan.

Eenvoudige sketse en duidelike beskrywings wys jou hoe om al die oefeninge stap vir stap te doen, en daar is ook video’s van ingewikkelde bewegings. Die plan is spesiaal deur ’n persoonlike afrigter vir Huisgenoot-lesers ontwerp, en as jy dit volg, is dit soos om ’n persoonlike afrigter in jou huis te hê. Dit kos net R495 vir toegang tot die volledige oefenplan – en jy betaal hierdie bedrag eenmalig.

Besoek www.huisgenootgeengim.co.za vir nog inligting en om in te skryf!

EKSTRA BRONNE: RESEARCHGATE.NET, MAYOCLINIC.ORG, APA.ORG
Jongste uitgawe

11 Augustus 2022

Jongste uitgawe
Klik hier om te gaan na jóú biblioteek met jou tydskrifte en -koerante.
Begin lees
Huisgenoot Eisteddfod

Wys jou talent en kry meestersklasse by bekendes!

Huisgenoot Eisteddfod
Is jou kind talentvol en lief vir die kunste? Skryf nou in vir Huisgenoot se splinternuwe aanlyn nasionale kunsfees.
Skryf nou in