book-icon Uitgawe 31 Desember 2020

‘The Lord of the Rings’ en meer: Dié boeke kan jy nou in Afrikaans lees

akkreditasie
Drie uiteenlopende boeke is nou in Afrikaans beskikbaar: Van die 'Lotta se lewe'-reeks tot die Bullebakke ('The Bad Guys') en 'Die heerser van die ringe' (The Lord of the Rings') .
Lotta se lewe – Slange en hansworse
Beskikbaar by graffitiboeke.co.za
Beskikbaar by graffitiboeke.co.za

Deur Alice Pantermüller; illustrasies: Daniela Kohl (Human & Rousseau, R158*)

“Kinders is eerlik – jy kom dit veral agter wanneer jy vir hulle voorlees. Dit is dus belangrik dat jy as skrywer ook eerlik is,” vertel die Duitse Alice Pantermüller in ’n oorsese onderhoud. “Moenie hulle met ’n pedagogiese wysvinger omhoog benader of probeer witvoetjie soek nie. Ek dink enigeen wat vir kinders skryf, behoort op hul oogvlak te wees. Dis die enigste manier om vas te stel wat vir hulle snaaks is en wat hulle raak en inspireer.”

Slange en hansworse, die 11de in die Lotta se lewe-reeks, is nou in Afrikaans vertaal. Die boeke lyk soos ’n kruis tussen ’n grafiese roman en ’n storieboek vol skribbels deur iemand wat baie goed kan teken.

Die interessante hiervan is dat dit lyk of daar fyn beplan is om die storie en die tekeninge saam te skep, maar dit is nie so nie.

“Om die waarheid te sê, ek werk nie eens saam met Daniela Kohl, die illustreerder, nie. Maar ek is bly om keer op keer te hoor die boeke wek die indruk dat hulle as ‘een produk’ geskep is,” vertel Alice. Sy verduidelik hoe hul nogal vreemde
proses werk.

“Ek skryf die teks, dit word geredigeer en goedgekeur, en dan eers ontvang Daniela dit. Sy set die teks, deel dit op in bladsye en laat plek oop vir haar tekeninge. Dan begin sy teken. Soms ontwerp sy ook van my teks deur dit in spraakborrels of ’n ander letter­tipe te sit. So dis wonderlik dat mense so gaande is oor ons goeie samewerking – terwyl daar geen is nie!”

Daniela stuur so 10 bladsye op ’n slag dan terug aan Alice, maar sy sê dis byna nooit dat sy vra dat iets verander word nie.

In Slange en hansworse moet Lotta se klas ’n verskeidenheids­konsert hou en hulle moet in pare optree. “Maar toe het juffrou Knacker natuurlik weer soos altyd alles bederf. Tipies! Sy het gesê sy gaan ons in spanne opdeel, want dit sal goed wees vir ons klasgees en blablabla . . .”

En so beland Lotta saam met Benni, ’n rocker, en haar beste maat, Chantelle, saam met die skaapkop LeighAnne. Soos altyd in liewe Lotta se lewe lei dit tot katastrofe op katastrofe.

Die Bullebakke – Episode 4

Teks en illustrasies deur Aaron Blabey (Protea Boekhuis, R117*)

Beskikbaar by graffitiboeke.co.za
Beskikbaar by graffitiboeke.co.za

Die waarskuwing dat ouma Oukaak “effens vreemd” is, is nie oordrewe nie.

Toe die Bullebakke-­klub by haar huis aankom en koekies en melk verwag, is sy die een wat net sappige happies sien en sy gryp Slang op die plek aan die strot. ’n Nies oorval haar egter en sy nies haar gebit skoon uit haar bek en bo-oor Brak-vol-vlooie se gesig.

Toe is Slang-sagte-­happie gans te taai en hard, en al wat Slang tussen haar kaal kake uitkry, is: “Hei! Sê die kens ou krokodil moet my uitlos!”

As dit mallerig klink, dit ís, en dis seker waarom die Australiër Aaron Blabey se boeke so gewild is, want kinders het mos ’n aweregse humorsin (wat nie baie skrywers ontgin nie).

The Bad Guys (die oorspronklike titel van die reeks) was nommer een op die New York Times se lys van top­verkoper- grafiese romans vir junior lesers.

Dit gaan oor die avonture van ’n groep skrik­wekkende diere wat hul bes doen om hul swak reputasie af te skud.

  • DreamWorks Animation maak ’n rolprent­verwerking hiervan wat hopelik in September 2021 uitgereik sal kan word.
  • Vier van die Bullebakke-­boeke is in Afrikaans beskikbaar.
Die koning keer terug – Die heerser van die ringe Deel 3
Beskikbaar by graffitiboeke.co.za
Beskikbaar by graffitiboeke.co.za

Deur J.R.R. Tolkien (Protea Boekhuis, R257*)

Drie Ringe vir die elfkonings onder die hemelwerf,
sewe vir die dwerghere in klipsale gekroon,
nege vir mense, gedoem om te sterf,
een vir die Donker Heer op sy donker troon
in die land van Mordor waar die skaduwees draal.
Een Ring om oor almal te heers, een Ring om hulle te vind,
een Ring wat almal bring en in die duisternis saambind
in die land van Mordor waar die skaduwees draal.

Dit is die laaste boek in J.R.R. Tolkien se klassieke trilogie. ’n Ieder en ’n elk moet nou saam­staan om die Duisternis te beveg: mense, dwerge, elwe, almal.

Al het jy al die flieks gesien, moet jy die boek lees – of aangee vir jou kind wat nou met Deel 1 en 2 klaar is.

Die oorspronklike The Lord of the Rings is in drie volumes uitgegee van Julie 1954 tot Ok­­tober 1955. Dit is een van die beste verkopers ooit en meer as 150 miljoen eksemplare is al verkoop.

Natuurlik is daar vandag nog Tolkien-­aanhangers wat elke feit op hul vingerpunte het en uit hul pad gaan om hul fantasieë uit te leef.

Die sosiale media maak dit ook vir hulle maklik om geesgenote te ontmoet.

Gaan kyk maar op Instagram by lord­oftherings_official waar 102 000 mense hul fantasieë met mekaar deel.

Daar is katte wat aangetrek is soos Pippin, báie mense wat aangetrek is soos Gandalf en ’n hele woordeskat wat net die ingewydes verstaan.
O, en dis LOTR, jou nerd.

Teen dié pryse beskikbaar by Graffitiboeke.co.za. Aflewering landwyd – as jy meer as R500 bestee, is dit gratis per koerier; Bestellings minder as R500 kos R89.

Jongste uitgawe

9 Desember 2021

Jongste uitgawe
Klik hier om te gaan na jóú biblioteek met jou tydskrifte en -koerante.
Begin lees