Nick en Audrey Spitz is speurders wat probeer om hul eie speuragentskap op die been te kry. Hulle word genooi na ’n miljardêr bekend as The Maharajah se privaat eiland, maar toe hulle daar aankom, word hul gasheer ontvoer. Hulle probeer dan die maharadja vind en huis toe bring.
Murder Mystery 2 sal byval vind by die soort kyker wat Glass Onion: A Knives Out Mystery en Death on the Nile geniet het.
Die fliek is ’n opvolg van 2019 se Murder Mystery wat gegaan het oor ’n New Yorkse polisieman (Adam Sandler) en sy vrou (Jennifer Aniston) wat op ’n Europese vakansie gaan. Daar beland hulle op ’n partytjie van die bejaarde miljardêr Malcolm Quince (Terence Stamp). Toe Malcolm vermoor word, word hulle die hoofverdagtes.
