Hulle is albei akteurs, en al twee jaar ’n paartjie, maar Beer en Carla was nog nooit saam in ’n televisiereeks te sien nie. Maar nou vertolk hulle die rolle van Meyer Basson en Cezanne Dippenaar in die kykNET-reeks Mooiweer en warm.
“Ons twee skryf dikwels saam en sal dan ’n lessenaar deel en dae lank omsit en elkeen aan hul onderskeie projekte skryf wat soms ’n bietjie alleen kan raak,” sê Beer.
Maar om ’n televisiestel met Carla te deel is ’n heel ander ervaring. “Ek moet sê dit was baie lekker. Date nights was skielik ’n woorde-hardloop-aand.”
Beer het voorheen aan Huisgenoot vertel dis nogal “intimiderend” om so ’n "ongelooflike aktrise" as meisie te hê. Carla was die afgelope paar jare te sien in reekse soos Tydelik terminaal, Ekstra medium en Troukoors.
En hy het haar werk al voor hulle ’n paartjie was bewonder. “Lank voor ons uitgegaan het was sy my gunstelingaktrise. So dit was ook net lekker om haar in aksie te sien op daardie manier, as mede-akteur.”
