Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kuier-tydskrif
Maak smaaklike etes met sampioene
15 April 2021
Eenpot-wonderwerk van hoender, portabellini en rys

Eenpot-wonderwerk van hoender, portabellini en rys

Genoeg vir 6 – 8

BESTANDDELE

Hoender

  • 6 – 8 hoenderstukke, met bene en vel
  • 2 eetlepels olyfolie
  • 1 teelepel borrie
  • 1 teelepel kerriepoeier
  • 1 teelepel uiepoeier
  • 1 teelepel gedroogde kruie
  • Varsgemaalde swartpeper
  • 1 teelepel sout

Rys

  • 1 eetlepel olyfolie
  • 2 eetlepels botter
  • 1 groot ui, in dobbelsteentjies gekap
  • Sout en peper na smaak
  • 4 knoffelhuisies, gemaal
  • 250 g portabellini-sampioene, in die helfte gesny
  • 1 groen soetrissie, in blokkies gesny
  • 1 groot tamatie, ontpit en in dobbelsteentjies gekap
  • 1 groen brandrissie, in repies gesny
  • 1½ koppies rou langkorrel-rys
  • 4 koppies hoenderaftreksel, warm
  • Vars kruie vir garnering

METODE

Hoender:

Vryf die hoender kwistig met olyfolie, speserye, kruie, peper en sout. Verhit ’n groot oondvaste buffetkasserolpan/breë pot met ’n deksel oor medium-hoë hitte. Verbruin die hoenderstukke in ’n lekseltjie olyfolie. Maak seker die vel is heerlik krakerig.

Verwyder die hoender uit die pan en plaas eenkant. Voorverhit die oond tot 200 °C.

Rys:

Verhit die olyfolie en die botter in dieselfde pot/pan wat vir die verbruining van die hoender gebruik is. Voeg die uie en ’n knippie sout by en soteer tot sag. Voeg die knoffel en die portabellini-sampioene by.

Soteer vir 1 – 2 minute tot goudbruin. Voeg die soetrissie, tamatie en brandrissie by en meng. Gooi die warm hoenderaftreksel by en roer die rys in.

Bring tot op prutpunt. Plaas die hoenderstukke knussies in die rys en aftreksel, sonder om die vel te onderdompel. Bedek met ’n deksel of tinfoelie en bak vir 25 minute.

Verwyder die deksel en bak vir nog 25 minute tot die rys gaar is en die hoendervel goudbruin en krakerig is. Pluis die rys met ’n vurk, garneer met vars kruie en bedien sommer so uit die bakskottel!


Samfa-Portabellini-pizza
Samfa-Portabellini-pizza

Samfa-Portabellini-pizza

Maak 2 pizzas

BESTANDDELE

Deeg

  • 1¼ koppies lou water
  • 1 eetlepel suiker
  • 1 standaardpakkie (2¼ teelepels) aktiewe droë gis
  • 3 koppies veeldoelige meel, plus ekstra om te bestrooi
  • 2 teelepels fyn seesout
  • ¼ koppie ekstra suiwer olyfolie

Bolae

  • 125 g portabellini-sampioene, gesny
  • Ekstra suiwer olyfolie
  • 1 knoffelhuisie, gerasper
  • Sout en peper na smaak
  • 1 koppie Napoletana-sous
  • 2 koppies mozzarella, gerasper
  • 8 repe streepspek, gaar en gekap
  • ¼ rooiui, in repies gesny
  • ½ pruimtamatie of ’n paar kersietamaties, in skyfies gesny
  • ½ avokado, in skywe gesny
  • ’n Hand vol vars rocket

METODE

Deeg:

Meng die lou water en die suiker in ’n bak. Sprinkel oor die gis en laat dit skuim. Meng die meel en die sout in ’n ander groot bak. Gooi die olyfolie en die gismengsel by. Meng alles goed.

Plaas die deeg op ’n werksoppervlak en knie tot die deeg elasties en glad voel – voeg ’n bietjie meel by, indien nodig. Vorm ’n stywe bal, plaas in ’n geoliede bak en bedek met ’n skoon vadoek. Laat dit op ’n warm plek rys tot die deeg in grootte verdubbel het – dit sal sowat ’n uur en ’n half neem.

Wanneer die deeg gerys het, druk dit liggies plat en verdeel dit in twee balle. Laat die deeg rus terwyl jy die oond tot op sy maksimum verhit en plaas ’n pizzaklip of ’n bakplaat in die onderste derde van die oond om warm te word.

Berei al jou bolae voor:

Braai die sampioene in ’n bietjie olyf-olie. Voeg die knoffel by sodra hulle amper gaar is. Maak die sampioene gaar tot geurig en geur goed met sout en peper na smaak. Druk een deegbol op ’n keer liggies plat, rol so dun uit as wat jy verkies en bestrooi dit met meel indien nodig.

Plaas versigtig op die warm bakplaat/pizzaklip en verf olie egalig oor die uitgerolde deeg. Sit die sous in die middel van die deeg en smeer dit met ’n lepel na die kante toe – los 2 cm vir die kors. Pak die mozzarella, sampioene, spek, rooiuie en tamaties bo-op. Geur.

Bak tot die kors goudbruin is en die kaas borrel – dit sal sowat 15 minute neem. Rond jou pizzas af met gegeurde avokadosnye en flenters rocket. Bedien onmiddellik.


Beesstert (oxtail) met knopiesampioene
Beesstert (oxtail) met knopiesampioene

Beesstert (oxtail) met knopiesampioene

Genoeg vir 6

BESTANDDELE

  • 1,2 – 1,5 kg beesstert
  • 2 eetlepels olyfolie
  • Sout en peper na smaak
  • 1 ui, in repies gesny
  • 4 knoffelhuisies, grofgemaal
  • 3 eetlepels tamatiepasta
  • 2 eetlepels sojasous
  • 2 lourierblare (bay leaves)
  • 3 naeltjies
  • ’n Handjie vol tiemietakkies
  • 1 koppie beesvleisaftreksel
  • 3 wortels, geskil en in groot stukke gesny
  • 1 x 400 g-blik botterbone, afgespoel en gedreineer

Sampioene

  • 1 eetlepel olyfolie
  • 1 eetlepel botter
  • 250 g wit knopiesampioene, in die helfte gesny
  • 2 knoffelhuisies, gemaal
  • Sout en peper na smaak

Opdiening

Witrys en vars tiemietakkies

METODE

Stel die drukkoker op sy soteerfunksie en wag tot hy reg is. Vryf die beesstert in met olyfolie en geur kwistig met sout en peper. Verbruin die beesstert in klompies alkante tot goudbruin. (Jy kan dit ook in ’n oond van 220 °C op ’n groot bakplaat doen.)

Verwyder die beesstert uit die binnepot en plaas eenkant. Voeg die uie by en soteer tot sag. Voeg die knoffel by en braai vir ’n minuut. Voeg die tamatiepasta, sojasous, lourierblare, naeltjies en tiemie by. Laat prut vir ’n paar minute tot die tamatiepasta soet ruik. Voeg die beesvleis-aftreksel by en maak seker die bodem van die pot is baie goed ontglans sodat niks in die binnepot vassit nie.

Sit die verbruinde beesstert terug in die binnepot. Maak seker die stukke is deels deur die vloeistof bedek. Pak die wortels in lae bo-op. Verseël die drukkoker en maak seker die ontlugknop is in die verseëlposisie. Drukkook op “hoog” vir 40 minute en dan op natuurlike vrylating vir 20 minute. Laat enige oorblywende druk per hand vry en maak die deksel oop.

Verwyder die beesstert en wortels baie versigtig met ’n gaatjieslepel en plaas eenkant. Gooi die tiemie- takkies weg. Stel die pot terug op die soteerfunksie en bring die sous tot op prutpunt. Voeg die botterbone by en laat die sous ’n bietjie wegkook.

Sampioene:

Berei intussen die sampioene voor. Laat ’n groot braaipan oor hoë hitte warm word. Voeg die olyfolie en botter by en soteer die sampioene tot goudbruin. Voeg die knoffel by net voor alles gereed is en geur met sout en peper. Plaas die beesstert en die wortels versigtig terug in die sous en die bone om alles warm te hou. Skep die goudbruin sampioene bo-oor. Besprinkel alles met vars tiemie en bedien op gestoomde witrys.


Sampioen-blomkool-en-cheddar-sop
Sampioen-blomkool-en-cheddar-sop

Sampioen-blomkool-en-cheddar-sop

Genoeg vir 2

BESTANDDELE

  • 30 ml botter
  • 250 g knopiesampioene, gesny
  • 1 klein knoffelhuisie, fyn gerasper (opsioneel)
  • 300 g blomkool, in repies gesny
  • 250 ml room
  • 1 koppie beleë cheddar, plus nog vir opdiening, gerasper
  • Sout en peper na smaak
  • ’n Handvol grasuie (chives), fyngekap

METODE

Verhit die botter in ’n me-diumgrootte kastrol oor hoë hitte. Voeg die sampioene by en braai tot hulle begin sag word (moenie hulle té donker laat word nie en plaas nou ’n paar eenkant om later as garnering te gebruik).

Voeg die knoffel by, roer vir ’n minuut en voeg dan die blomkool en die room by. Bedek en bring tot op prutpunt – maak seker dat dit oorkook nie. Laat dit vir sowat 5 – 7 minute kook, of tot die blomkool sag is. Gooi in ’n voedselverwerker en verwerk tot baie glad.

Voeg die cheddar by en geur na smaak. Bedien warm, en besprinkel met nog kaas, die sampioene wat eenkant gehou is en die grasuie.


Sampioenfrikkadelle met  tamaties en suurroom
Sampioenfrikkadelle met tamaties en suurroom

Sampioenfrikkadelle met tamaties en suurroom

Genoeg vir 4 – 6

BESTANDDELE

Frikkadelle

  • 250 g beesmaalvleis
  • 250 g groot bruin sampioene, gemaal
  • 90 g vars broodkrummels
  • 45 ml vars pietersielie, gekap
  • 1 eier, geklits
  • Sout en gemaalde swartpeper
  • 15 ml olie

Sous

  • 1 blik tamatie-en-uiemengsel
  • 250 ml beesvleisaftreksel
  • 15 ml tamatiepasta of songedroogdetamatie-pasta
  • 5 ml gerookte paprika
  • 1 geroosterde geelrissie, in skyfies gesny
  • Sout en gemaalde swartpeper

Opdiening

Suurroom

Gerookte paprika

Origanum of tiemieblare

Kapokaartappels (mashed potatoes) en seisoenale groente

METODE

Frikkadelle:

Voorverhit die oond tot 180 °C. Meng al die bestanddele, behalwe die olie, in ’n mengbak.

Vorm lepelgrootte frikkadelle met jou meelbestrooide hande. Verhit die olie in ’n pan en verbruin die frikkadelle alkante. Sit die frikkadelle in ’n oondvaste kasserol.

Sous:

Meng al die sousbestanddele en drup oor die frikkadelle. Geur met sout en peper. Bedek en bak vir 20 – 25 minute in die oond. Versier met ’n krul suurroom, ’n bietjie gerookte paprika en origanum of tiemie.

Bedien met kapokaartappels en seisoenale groente.


Vark-sampioen-en-salievleisbrode
Vark-sampioen-en-salievleisbrode

Vark-sampioen-en-salievleisbrode

Genoeg vir 6

BESTANDDELE

  • 10 ml olie
  • 1 ui, fyn gekap
  • 250 g groot bruin sampioene, gemaal
  • 250 g varkmaalvleis
  • 15 ml vars salie (sage), gekap
  • 5 ml vars tiemie
  • 5 ml suurlemoen of lemoenskil
  • 1 eier, geklits
  • 125 g vars broodkrummels
  • 250 g streepspek

Opdiening

  • 200 g groot bruin sampioene, in repies gesny en gebraai
  • Seisoenale groente
  • Kapokaartappels (mashed potatoes)
  • Pietersielie, gekap

METODE

Voorverhit die oond tot by 180 °C. Verhit die olie in ’n pan en braai die uie liggies vir 4 – 5 minute of tot sag. Stel die hitte hoër en voeg die sampioene by. Braai vir 3 – 4 minute.

Skep die mengsel in ’n mengbak en laat heeltemal afkoel. Roer die varkmaalvleis, salie, tiemie, suurlemoenskil, eier en broodkrummels in en meng goed. Smeer ’n groot 6-koppiekolwyntjiepan en sit 2 repe spek in ’n kruispatroon onder in elke koppie. Vul met maalvleis-mengsel. Plaas die res van die spek in ’n kruispatroon oor die vleisbrode as bedekking.

Bak vir 25 – 30 minute in die oond. Laat vir 10 minute afkoel en haal uit die koppietjies uit. Die vleisbrode kan voor opdiening vir 4 – 5 minute gerooster word. Bedien op ’n bed van gaar sampioene, seisoenale groente en kapokaartappels. Garneer met pietersielie.


Beesvleis-en-sampioen-bolognese
Beesvleis-en-sampioen-bolognese

Beesvleis-en-sampioen-bolognese

Genoeg vir 2

BESTANDDELE

  • 30 ml olyfolie
  • 1 ui, geskil en gekap
  • 1 wortel, geskil en gekap
  • 2 knoffelhuisies, fyngekap
  • 4 takkies tiemie, houtagtige stingels verwyder
  • 250 g beesmaalvleis
  • 250 g knopiesampioene, gesny
  • 1 blik gekapte tamaties
  • 1 koppie beesvleisaftreksel
  • 5 ml (1 teelepel) suiker
  • 5 ml (1 teelepel) gerookte paprika
  • Sout en peper na smaak
  • Pasgekookte pasta (soos spaghetti), vir opdiening
  • Vars basiliekruidblare (basil), vir opdiening (opsioneel)
  • Parmesaan vir opdiening (opsioneel), gerasper

METODE

Verhit die olie in ’n mediumgrootte kastrol en voeg die uie en wortels by. Braai oor medium-hoë hitte tot sag, maar nog nie bruin nie. Voeg die knoffel en tiemie by en braai vir nog ’n minuut.

Voeg die maalvleis en sampioene by en braai – breek klonte met jou houtlepel. Braai tot die mengsel aan die bodem begin klou – sowat 10 – 15 minute – voeg dan die tamaties, aftreksel, suiker en paprika by en roer goed.

Geur met sout en peper, bedek, laat prut oor lae hitte vir ten minste 30 minute (of tot 2 uur) en roer nou en dan. Proe en geur na smaak, indien nodig. Bedien warm op pasgekookte pasta, met vars basiliekruid en parmesaan bo-oor gestrooi.

WENK:
Die byvoeging van sampioene laat hierdie bolognese nóg vleiseriger smaak – met baie minder vet en natrium as ’n dis wat net met vleis gemaak is. ’n Puik dis, elke aand van die week.

Tamatie-en-sampioen-dhal
Tamatie-en-sampioen-dhal

Tamatie-en-sampioen-dhal (portabellini)

Genoeg vir 4 – 6

BESTANDDELE

  • 30 ml olie
  • 1 ui, in dobbelsteentjies gekap
  • 3 knoffelhuisies, gekneus
  • 15 ml vars gemmer, fyn gerasper
  • 15 ml kerriepasta
  • 400 g portabellini-sampioene, gehalveer
  • 1 x 410 g-blik gekapte tamaties
  • 2 x 410 g-blikke bruin lensies, gedreineer.
  • 45 ml ongegeurde jogurt of dik room
  • 30 ml vars koljander, gekap

METODE

Verhit die olie in ’n pan en braai die uie en die knoffel liggies vir 5 – 7 minute.

Voeg die gemmer, die kerriepasta en die sampioene by en kook vir 3 – 4 minute. Roer die tamaties en die lensies by en laat prut vir 5 minute. Bedek met die jogurt of die room en die koljander. Bedien met rys of naanbrode, raïta en/of geroosterde klapper. 

Opdiening (opsioneel)

  • Rys
  • Naanbrood
  • Raïta
  • Geroosterde klapper
Meer oor:  Kos  |  Kuier  |  Resepte  |  Sampioene
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.