‘n Lekker storie. Ek kan nie aan ‘n beter term dink om Frans Marx se jongste film, Susanna van Biljon – Leef jou droom, te beskryf nie.

Ek gaan nie jok nie, ek het my bedenkinge gehad toe ek die eerste keer die uitnodiging na die Premiére van die film in Pretoria ontvang het.

“Aaai, ek hoop nie hierdie is nog een van die tipiese tragiese Suid-Afrikaanse stories of iets soortgelyk aan die walgkomedies wat so dikwels die lig sien nie”, het ek gedink.

Die film vertel die storie van ‘n vrou, Rebecca Dreyer, wat haar lewe lank nog op ‘n klein Karoo dorpie bly, en amper op 40 steeds onder haar ma se dak woon.

Haar droom is om soos Nicholis Louw, Kurt Darren of Bobby van Jaarsveld die Afrikaanse volk se harte met haar musiek te wen. Tussendeur stel ‘n boer van die omgewing (wie se rol David Rees vertolk) ook baie belang in Rebecca en wil hy met haar trou.

Die film sorg vir genoeg drama en interne emosie vir die kyker. Dit word tussendeur opgekikker deur akteurs soos Sharleen Surtie-Richards wat jou laat lag (soms met ‘n traan), en deur die tipiese karakters van elke plattelandse gemeenskap wat jy met 'n glimlag herken.

Die film is in samewerking met Solidariteit Helpende Hand bekendgestel. Dit fokus op die besef dat jy kan doen wat jy wil ,maak nie saak waar jy vandaan kom nie. Dit bring ook ‘n boodskap van hoop en medemenslikheid, wat ons almal nodig het.

Ek was skoon verbaas oor die inspirerende energie wat deur my are gepomp het terwyl ek oppad huistoe was… Ek dink dit is die gevoel wat Frans in gedagte gehad het terwyl die fliek vervaardig is.

Ek raai die fliek aan vir enige fliekganger wat opsoek is na ‘n frons, ‘n lag en ‘n traan!

David Rees en Karen Zoid by van hulle aanhangers tydens die bekendstelling. (Foto: FC Pelzer. Verskaf deur Solidariteit Helpende Hand)

Kurt Darren en sy verloofde, Dunay Nortjé, was ook by die geleentheid. Darren is ook in die film te sien. (Foto: FC Pelzer. Verskaf deur Solidariteit Helpende Hand)

Bobby van Jaarsveld het ook die geleentheid bygewoon. (Foto: FC Pelzer. Verskaf deur Solidariteit Helpende Hand)