Hoe het jy aan die idee van die hasies gekom?

Met my liefde vir handgemaakte poppe, maar veral my liefde (of is dit eerder my obsessie?) met hasies, het ek begin rondspeel met idees en patrone. Oorspronklik het ek net vir my eie dogtertjie speelgoed gemaak, maar later het meer en meer mense vir hasies begin vra en so is HasieLief gebore. As ek inspirasie nodig het, gaan blaai ek net deur my storieboeke of gaan loer op Instragram na kinderklere om die hasies mee uit te rus.

Wie is jou mark? Is dit veral kinders?

My beste klante is oumas wat die waarde van 'n sagte, handgemaakte pop besef. Die ontvangers van die hasies is meestal nuwe babatjies wat gebore word. Dis gelukkig nie net kinders wat in die vreugde van die hasies mag deel nie, want selfs 'n hele paar “grootmense” het al vir hulself 'n haas of twee bestel.

Wie help jou met alles?

Ek maak al die patrone, hasies en hul klere self. Ek behartig ook die administrasie, fotografie en sosiale media. My man en kinders help met balans en koffie. Harde werk en goeie beplanning bly maar my leuse. Wanneer dit die dag té rof raak, dra my liefde vir handwerk my deur en speel ek weer verder.

Wens jy daar was iets wat jy geweet het voordat jy met die onderneming begin het?

As 'n mens terugkyk, sou ons almal seker wens om eers al die kennis te hê, maar wysheid kom slegs met verloop van tyd. Ek glo nie 'n mens hoef eers alles te weet voordat jy begin nie: Jy leer namate jy aangaan. Die belangrikste is om aan te hou leer, veral uit jou foute.

Verandering is deel van die proses. Wees daarom sommer uit die staanspoor voorbereid daarop dat dinge nie altyd dieselfde gaan bly nie. Gebruik wat jy tot jou beskikking het, en maak die meeste van die oomblik.

Besoek www.hasielief.co.za vir meer.