Vandeesweek kyk ek na versekering vir kinders, meer spesifiek kinders van werkende en studerende ouderdom. Sorgsame ouers sal genoeg versekering hê. Met hierdie versekering bedoel ek spesifiek langtermynversekering, soos lewensdekking, ongeskiktheidsdekking en gevreesdesiektedekking.

Ek sien dikwels dat ouers nie die finansiële risiko’s raaksien wat betref dat kinders kan sterf, ongeskik raak of ’n gevreesde siekte opdoen nie. ’n Mens kan dit seker verstaan. Van geboorte af is die kind van jou afhanklik en dit duur ’n oomblik van besef, of dalk ’n wakkerskrik, om te weet dat die finansiële risiko’s van ’n kind, wanneer hy of sy los van die rokspante is, ’n werklikheid is.

Kom ons kyk eers kortliks na die redes vir hierdie soort versekering. Ons noem dit risikoversekering omdat dit dekking bied teen onvoorsiene gebeure.

Ek hou daarvan om hierna te verwys as die “wat as . . .”-vrae. Wat as ek doodgaan? Wat as ek ongeskik raak? Met ander woorde, wat sal die finansiële gevolge wees as só iets met my gebeur? Of met my vrou? Of, vir die doel van hierdie rubriek, my kind?

Die opbrengs op ’n lewenspolis maak voorsiening vir skuld – iets waarmee jy nie jou geliefdes wil agterlaat nie. Dit bied sekerheid wat onder meer inkomste betref vir ’n oorlewende gade en studiegeld vir jong kinders eendag.

Wanneer kinders uit die huis beweeg en op hul eie voete begin staan (al is hulle nog studente of al werk hulle vir hul pa op die plaas) dra hulle finansiële gevolge met hulle saam indien die lewe nie verloop soos ek en jy gewoonlik vir ons kinders beplan nie.

Kinders koop motors. Kinders het studieskuld. Kinders trou en het kinders. Ja, soms terwyl hulle nog nie veel meer as ’n sakgeldjie verdien nie. Wil jy met jou kind se skuld sit wanneer hy of sy sterf? Wil jy, indien jou kind ongeskik raak, instaan vir die koste om dalk daardie kind vir die res van sy of haar lewe te onderhou en medies te versorg, terwyl jy al aan aftrede begin dink het?

Nee, dit is onnodig. Al kan jy nie beplan vir wat met jou kind kan gebeur nie, kan jy wel beplan vir wanneer iets wel gebeur.

Ek het al gehoor van ouers wat sê hulle wil nie geldmaak uit hul kind se dood nie. Dit is nie waaroor dit gaan nie. Jy maak nie geld uit sy of haar dood nie. Jy maak wel seker die kind se dood of ongeskiktheid vat nie die geld wat jy het, ook nog weg nie.

Versekering vir jong mense is boonop regtig goedkoop. Deur vroeg reeds versekering uit te neem, kan die kind in later jare, soos sy of haar finansiële verpligtinge meer raak, die voordeel trek van die goedkoper premies.

Hoeveel is genoeg? Vir ’n begin sal ek kyk na lewensdekking van sowat R500 000 of R1 miljoen. Dit is regtig spotgoedkoop vir ’n twintigjarige. Maak net seker die bedrag bied dekking vir alle skuld en ook so ’n bietjie meer, net net indien dit sou nodig wees.

Vir ongeskiktheid meen ek dubbel soveel. Die rede? Dit kan wees dat die kind vir die res van sy of haar lewe van jou afhanklik gaan wees. Die risiko van ongeskiktheid by jong mense is hoog. Dit is op sy hoogste hier rondom die ouderdom van 24. Neem dus hierdie risiko ernstig op.

Ek sal ook aanbeveel dat jy oorweeg om toekomsdekking uit te neem. Dit kos ’n paar rand ekstra per maand, maar verseker die persoon se gesondheid. Dit beteken hy of sy kan in die toekoms bykomende dekking uitneem sonder om weer mediese toetse te ondergaan.

Hierdie dekking is goed vir iemand wat nie nou baie verdien nie, maar wil verseker dat hy of sy vorentoe, wanneer die finansiële verpligtinge meer en die inkomste ’n bietjie hoër is, wel dekking sal kan kry.

Kyk ook na gelykblywende premies en nie stygende premies nie. In ’n mens leeftyd kan dit baie duur raak. 

Nico van Gijsen is ’n gesertifiseerde finansiële beplanner, belastingpraktisyn, lid van Fisa en besturende direkteur van Finlac, ’n onafhanklike finansiëlerisiko-bestuursmaatskappy. NAVRAE: Mnr. Nico van Gijsen, e-pos: nico@finlac.com, 021 461 2067.