Uit: Landbouweekblad, 15 April 1988

Met die Britse Melkbemarkingsraad se nuwe Dairyfax-diens kan boere statistieke van bulle (onder die hofie bulkrag) op hul rekenaars oproep en daaruit die mees geskikte bul vir hul koeie soek.

Boere kan ook die nuwe diens gebruik om vertroulike produksie-, veeartseny- en plaasbestuurstatistieke uit die raad se sentrale rekords op te roep.

Dit word moontlik gemaak deur British Telecom se Prestel-kykdatadiens wat terminale in huise en kantore deur die openbare telefoonnetwerk aan groot rekenaars koppel.

Op die foto is mnr. Ray Hawkins met die rekenaar besig terwyl Victoria, Maydream en die res van die kudde bekommerd nader staan om te kyk watter bul die rekenaar vir hulle uitsoek.