Dit was die boodskap van dr. Ademir Calegari, ’n herlewingslandboukundige wat al in 47 verskillende lande werksaam was, op Landbouweekblad se 2019-herlewingslandboukonferensie op Reitz.

Volgens hom is volhoubare landbou afhanklik van die kombinasie van die gebruik van dekgewasse, ’n geenbewerkingstelsel en wisselbou, asook die lewensgehalte van die boer en sy afhanklikes. 

Calegari het met groot entoesiasme vertel van die opbrengsverskille wat hy al by boere in verskeie lande waargeneem het. Sy werk in verband met geenbewerking, dekgewasse en wisselbou het reeds in 1977 begin.

Calegari het ’n graad in akkerbou en ’n meestersgraad in grondwetenskappe aan onderskeidelik die Universiteit van Brasilië en die Universiteit van Aberdeen in Skotland verwerf. Hy het later ook sy doktorsgraad verwerf. Hy het al gedien as konsultant vir die VN se Voedsel- en Landbou-organisasie en die Wêreldbank.

Dekgewasse

Van die onlangse suksesse waaroor Calegari verslag gedoen het, is by bestaansboere in Lesotho, waar die gebruik van onder meer dekgewasse hul mielie-opbrengs van minder as ’n ton per ha tot tussen 6 t/ha en 8 t/ha verbeter het. Sy navorsing het ook boere in Mosambiek gehelp om binne drie jaar hul mielie-opbrengs van 600 kg/ha tot 9 t/ha te verhoog.

Dekgewasse en herlewingslandboupraktyke het ook al koffieprodusente in die distrik Sao Paulo in Brasilië gehelp om hul oeste te verdubbel tot 3,5 t/ha, terwyl suikerrietproduksie elders in dié distrik tót 20 t/ha bereik het.

Calegarie skryf Brasilië se sukses met geenbewerking toe aan die doeltreffende keuse van dekgewasse. 

Ander lande waar Calegarie al navorsing gedoen het sluit in Frankryk, Argentinië, Zambië, Suid-Afrika, Amerika, Ghana, Tanzanië en Noord-Korea.

Chemikalieë

Calegarie het boere aangemoedig om te “luister na dit wat hul grond en plantmateriaal benodig”. Volgens hom moet toediening van chemikalieë iets van die verlede wees.

Hy het boere aangemoedig om hul grond se gesondheid te laat ondersoek en van ’n ingeligte basis besluite te neem oor wat hul grond benodig. “Almal se grondbehoeftes gaan verskil. Vind uit wat die kwessies eie aan jou grond is en spreek dit aan.

“Kan ons die gehalte van ons grond verbeter en beter boer? Ja, ons kan! Ons moet net ons idees verander, ons moet net ons gedagtes (oor grond en grondgesondheid) verander.” Vir die toekoms van die landbou moet “intelligente landbou” ontwikkel word, het Calegarie gesê.

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op Whatsapp om daaglikse landbounuus op jou selfoon te ontvang.