Dit was die boodskap van mnr. Dawie Maree, hoof van landbou-inligting en bemarking by FNB Landbou, met die besoek aan die plaas van mnr. John Eustace, Voermol se Beesboer van die Jaar vir 2018, op Voermol se Nasionale Beesboer van die Jaar-boeredag naby Underberg.

Hy het verwys na die buro vir voedsel- en landboubeleid se vooruitskouing dat die rooivleisbedryf na verwagting oor die volgende 10 jaar met sowat 2,4% per jaar sal groei en beesboere sal dwing om hul strategieë aan te pas om voordeel uit daardie groei te trek.

Volgens Maree is die verbruikerslandskap besig om te verander, met ’n groot verskuiwing van gemarginaliseerde verbruikers wat verminder en middelklasverbruikers wat besig is om toe te neem. “Boere moet hiervan kennis neem en besef dat daar ’n groeiende mark vir hul produkte is en daarvolgens strategieë ontwikkel om die volle voordeel daaruit te trek,” het Maree gesê.

ELKE STRAtEGIE UNIEK

“Die beste strategie is die een wat vir jou op jou eie plaas suksesvol werk. Omstandighede verskil van plaas tot plaas, en dit wat byvoorbeeld vir jou buurman werk, is nie noodwendig die bloudruk tot volhoubare sukses nie. Die goue draad wat egter deur al die verskillende suksesvolle strategieë loop, is dat jou strategie op lang termyn finansieel volhoubaar en winsgewend moet wees.”

Om so winsgewend moontlik te wees, is dit belangrik dat die produsent se eienaarskap van die rooivleisproduk so lank as moontlik moet duur, het Maree gesê. “Vertikale integrasie, waar waarde tot jou eie produkte toegevoeg word deur byvoorbeeld ’n voerkraal by jou produksie-eenheid op die plaas te voeg, en samewerking met jou plaaslike abattoir en slagter, kan dus ver gaan om waarde tot jou produkte te voeg.”

Boere moet ook bewus wees van die faktore wat die mark kan ontwrig, soos die onlangse uitbreking van bek-en-klouseer, wat tot ’n ernstige afname in slagtings gelei het. “Voeg daarby die invloed van die listeriose-uitbreking verlede jaar, wat ook ’n uitwerking op die plaaslike rooivleismark gehad het, en die ontluikende invloed van nisprodukte soos Wagyu-produkte, en hierdie faktore kan ’n beduidende rol in jou uiteindelike strategie speel.”

WENKE

Bemark teenoor verkoop. “Wees ’n bemarker en nie ’n verkoper van jou produk nie. ’n Verkoper is ’n prysnemer, terwyl ’n bemarker die beste pryse vir sy produk najaag om op lang termyn volhoubaar te wees.”

Ken jou vee en hul waarde. “ ’n Boer moet sy vee se kenmerke, groeitempo, voeromsetting en koste soos die palm van sy hand ken, en oor deeglike kennis van die huidige markneigings beskik. As jy nie weet wat in die mark aan- gaan nie, is daar ’n baie goeie kans dat jy jou vee vir ’n nie- volhoubare prys van die hand gaan sit.”

Koste van produksie en risiko-weerstand. “Die boer moet presies weet hoeveel dit hom kos om een eenheid, of dit ’n speenkalf, ’n kalf in die voerkraal of ’n veldbees is, te pro- duseer. Dit is slegs wanneer jy weet wat die koste van pro- duksie is, dat jy jou risikoweerstand kan begin bereken, aangesien jy presies weet waarvoor jy daardie dier van die hand moet sit om volhoubaar te wees.”

Finansiële reserwes. “Ons almal weet die rooivleismark is ’n sikliese mark met goeie en moeilike jare. Bou dus ’n stewige finansiële reserwe in die goeie jare op wat jou deur die moeilike jare sal dra."

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.