Dit is aangebied deur die Simonstad-klub en die Weskus- militêre perdesentrum. 

Die liggewigruiter Mariska Burger (Weskus-klub) het die 80 km-roete, wat na Jacobsbaai en die Saldanha-natuurreservaat loop, die vinnigste afgelê. Sy was altesame 4 uur 15 minute en 45 sekondes in die saal. Haar perd, Wadrif Achmed, het ’n gemiddelde spoed van 18,77 km/h gehandhaaf.

Die standaard- en swaargewigwenners was onderskeidelik Julia de Kock (Tuinroete-klub) op Wadrif Kasalo en Koos de Villiers (Simonstad-klub) op Tucuman.

Shade Ellis (Wes-Kaap-klub) en haar perd, Atilla, het die spesiale Voerdokter-prys ontvang. Perd én ruiter het die afgelope drie jaar beenbreuke opgedoen en ná ’n lang herstelproses die taai 80 km-roete met gemak teen ’n gemiddelde spoed van 14,5 km/h voltooi.

Veeartse ondersoek elke perd vóór die rit, ná elke skof en ná die eindpunt. Daar is ná elke skof ’n verpligte ruspunt waar perde afkoel, drink, vreet en deur veeartse ondersoek word. Die veeartse besluit of die perde verder mag deelneem.

Ná afloop van die rit ken die veeartsspan, drr. Mark Walton, Henk Basson en Dave Longland, pryse toe vir die perde in die beste toestand.

Hulle kyk onder meer na hartkloptempo, slymvliese, dermklanke, hidrasie en beweging. Die lig-, standaard- en swaargewigwenners van dié gesogte pryse was Mariska Burger, Nicolene Leidig (Weskus-klub) op Nourma Storm en Koos de Villiers.

Die standaardgewig-wenner Julia de Kock (Tuinroete-klub) op Wadrif Kasalo.
Die liggewig-wenner Mariska Burger (Weskus-klub) op Wadrif Achmed.
Shade Ellis ontvang die spesiale Voerdokter-prys van George Smuts. Sy én haar perd, Atilla, het beenbreuke opgedoen en ná ’n lang herstelproses die taai 80 km-roete afgelê.
Die swaargewig-wenner Koos de Villiers (Simonstad-klub) op Tucuman.