Met die tegnologie, wat nie sy gelyke wêreldwyd het nie, kan boere tot op die vlak van enkele blare waarnemings maak. Die Kaapse maatskappy Aerobotics het die tegnologie op 11 Oktober bekend gestel.

Mnr. James Paterson, medestigter en uitvoerende hoof van Aerobotics, sê met hierdie tegnologie kan boere sonder moeite en selfs sonder om ’n voet in die boord te sit, baie vroeg ’n plaag of siekte identifiseer. “Hierdie tipe tegnologie was tot nou nog net ’n droom, maar vandag maak ons die toekoms van boerdery ’n werklikheid,” het hy gesê by die bekendstelling op die wynplaas Leopard’s Leap buite Franschhoek.

Aerobotics se Aeroview-tegnologie, wat satellietbeeldmateriaal gebruik om kolle uit te wys waar ’n boord of wingerd stres ervaar, bepaal outomaties ’n roete vir ’n hommeltuig om die kolle te inspekteer. Die hommeltuig neem op ’n hoogte van slegs een meter bo die blaredak hoëresolusiefoto’s, wat onmiddellik opgelaai word na Aerobotics se databasis – die eerste databasis in sy soort ter wêreld. Kunsmatige intelligensie sal dan die siekte of plaag identifiseer en onmiddellik ’n verslag na die boer se selfoon stuur.

Tot dusver moes boere gedurig hul wingerde en boorde inspekteer en op hul ervaring en kennis steun om siektes en plae te identifiseer. Hommeltuie en kunsmatige intelligensie verrig nou die taak, iets wat boere geld, tyd en energie bespaar, sê mnr. Michael Malahe, databestuurder by Aerobotics.

Mnr. Benji Meltzer, medestigter en tegniese hoof van Aerobotics, sê dat hierdie tegnologie “ook ’n groot invloed sal hê op die grootte en gehalte van oeste, omdat siektes en plae vroeër geïdentifiseer kan word en dus ’n kleiner invloed sal hê op die oes.” Hoe langer hierdie tegnologie toegepas word en hoe meer data ingewin word, hoe vinniger en akkurater sal die vroeë identifisering van siektes en plae word.

Mnr. Johan Hudson, nasionale hoof van Nedbank se afdeling vir landboubesigheid, sê die bank is trots daarop dat hy ’n minderheidsaandeel in Aerobotics het. “Die resultate wat ons reeds uit hierdie tegnologie sien, is die toppunt van tasbare waarde en die mag van ontwrigting wat reg gedoen word om nuwe werklikhede vir sake en boerdery te skep. Dit strook met ons doel om ons finansiële kundigheid aan te wend tot die voordeel van die landbou.”

Meer as ’n jaar gelede het Landbouweekblad in ’n inligting-vennootskap met Aerobotics betrokke geraak. Chris Burgess, hoofredakteur, sê Landbouweekblad is trots om betrokke te wees by ’n plaaslike maatskappy wat baanbrekerswerk aan die snykant van landboutegnologie doen en tegnologie gelewer het nêrens anders ter wêreld voorkom nie.

Buiten die geoutomatiseerde tegnologie waarmee siektes en plae geïdentifiseer word, het Aerobotics ook tegnologie bekend gestel wat met kunsmatige intelligensie outomaties inspeksieroetes vir hommeltuie bepaal, hommeltuie in staat stel om volgehou slegs een meter bo die blaredak te vlieg, kunsmatige intelligensie wat siektes en plae met die Aerobotics-databasis identifiseer, en verslagdoeningstegnologie wat die boer akkurate en bruikbare inligting gee.

Hierdie bekendstelling het tegelykertyd op elf persele reg oor Suid-Afrika plaasgevind. Meer as 700 mense het die elf geleenthede bygewoon.

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op Whatsapp om daaglikse landbounuus op jou selfoon te ontvang.