Hy het op die onlangse bemarkingsimposium van Subtrop, die sambreelligaam vir subtropiese gewasse, gesê China verteenwoordig reeds 40% van die wêreld se handel in vars groente en 31 van sy stede se ekonomie is so groot soos dié van sommige lande. Hongkong se ekonomie is byvoorbeeld so groot soos dié van Noorweë en Shenzhen s’n so groot soos dié van Swede. Shanghai en Nederland se ekonomieë is ewe groot en Switserland se ekonomie is gelykstaande aan dié van Beijing.

Silke sê boere moet ook die bevolkingsprofiel in ag neem wanneer hulle besluit wat om te verbou. “Verouderende bevolkings, soos dié van Japan en sommige Europese lande, sal meer geld aan gesondheid en gesonde produkte bestee. Organies verboude produkte speel ’n belangrike rol in dié verband,” sê hy.

Minder optimisties oor die res van die wêreld

Silke se vooruitsigte vir die res van die wêreld is minder optimisties. Hy verwag, soos die meeste ekonome, ’n styging in rentekoerse in Amerika, wat slegte nuus vir Suid-Afrika en ander ontwikkelende lande sal wees. “Die swak ekonomiese klimaat in die ontwikkelde wêreld die afgelope tien jaar het ontwikkelende ekonomieë help groei,” sê hy.

Hy sê hoër rentekoerse sal beleggers in Amerika aanspoor om hul geld uit ontwikkelende ekonomieë, soos Suid-Afrika, te onttrek en in die veiliger en bestendiger Amerika te belê.

Hy sê alles is egter nie maanskyn en rose vir die Amerikaanse ekonomie nie. Hy sê die probleem is dat die Amerikaners hul werkloosheidsyfer so te sê uitgewis het, maar ten koste van loonverhogings. “Meer mense het nou werk, maar hul inkomste groei nie. Op lang termyn kan dit tot politieke onrus lei.”

Baie lande in die eurosone het dieselfde probleem, terwyl Britse verbruikers die gevolge van Brexit aan hul sakke voel.

Silke sê hoewel Eerstewêreld-handelsvennote belangrik bly vir Suid-Afrika, moet boere gereed wees vir veranderinge aan handelsooreenkomste. Regerings sal al hoe meer onder druk kom om populistiese reëls in te stel.