Die ekonomiese vennootskapsooreenkoms tussen Suid-Afrika en die Europese Unie, Suid-Afrika se grootste handelsvennoot, maak voorsiening vir 110 miljoen liter Suid-Afrikaanse wyn wat tariefvry na die EU kan vloei. In ruil daarvoor kan die EU hoofsaaklik spiritualieë na Suidelike Afrika uitvoer, maar dit word belemmer deur die alkoholverbod.

Mnr. Ulrich Adam, direkteur-generaal van spiritsEUROPE wat die wêreld se grootste spiritualie-produsente verteenwoordig, het verlede week ’n dringende beroep op die Suid-Afrikaanse regering gedoen om die verbod gou te lig “of vernietigende gevolge in die binne- én buiteland te verwag”.

“Deur verkope te verbied, beteken dit invoere van Europese spiritualieë word ook verbied, terwyl Suid-Afrika aanhou om wyn tariefvry onder die ooreenkoms uit te voer.”

Volgens hom beloop Suid-Afrika se netto-uitvoerverdienste hieruit sowat R5,7 miljard.

“Ons lede wat in Suid-Afrika sake doen is diep besorg oor die huidige handelstoestande. Die gebrek aan duidelikheid oor wanneer en óf die verbod gelig gaan word, maak dit onmoontlik om te beplan. Ons het ’n duidelike en betroubare tydlyn nodig.”

Mnr. Sibani Mngadi, die Suid-Afrikaanse drankbedryf se woordvoerder, sê dis belangrik dat die regering die algehele invloed van die verbod oorweeg.

“Dit is noodsaaklik dat die regering ’n verdere nadelige slag vir ons plaaslike ekonomie voorkom asook vir ons internasionale verpligtinge as ’n land.”

Luidens ’n verklaring het die drankbedryf ’n inkomsteverlies van meer as R19 miljard gely en R3,4 miljard se aksynsbelasting is daarmee heen. Die land het ook sowat R13 miljard aan beleggings verloor nadat SA Brouerye, Heineken en Consol Glass verlede week aangekondig het hulle staak kapitale uitbreidings weens die verbod.

Die Suid-Afrikaanse mediese navorsingsraad (SAMNR) het reeds einde Julie ’n beroep op die regering gedoen om die verbod op drankverkope te lig.

“Ons het bereik wat ons moes met die aandklokreël en die alkoholverbod. Nou moet ons ander probleme oplos. Ons het die lewens, nou moet ons kyk na broodwinning,” het dr. Glenda Gray, president van die SAMNR, tydens ’n onderhoud op Business Day TV gesê.