“Die neigings toon daar sal druk op kelders en wingerde wees. Produsente moet seker maak hul plukspanne is groot genoeg, en ook sorg dat daar genoeg vragmotors is om die druiwe van die wingerd na die kelder te vervoer,” het mnr. Conrad Schutte, hoof van Vinpro se konsultasiedienste, tydens die organisasie se inligtingsdag in Kaapstad gesê.

Druiwe wat vir Cap Classique gepars is, was sowat ’n week vroeër as gewoonlik gereed. Schutte verwag dat die meeste wit kultivars, asook Cabernet sauvignon en Shiraz aan die rooi kant, vroeg ryp sal wees.

Soos parstyd vinnig nader kom, moet wynboere sorg dat hulle gereeld in die wingerd kom om monsters te neem. Variasie binne wingerdblokke is aan die orde van die dag. “Toets volgens grond en opbrengsverskille, en ook ál meer gereeld nader aan oestyd,” was Schutte se raad.

Die blokke wat reeds geoes is, het bevredigende opbrengste gelewer. Die druiwe se suurvlakke was goed en die pH-waardes laag. Kleurontwikkeling was ook goed.

Oesskatting in streke

Die totale wyndruifoes sal waarskynlik iewers tussen verlede jaar se oes van 1,2 miljoen ton druiwe en die vyfjaargemiddelde van 1,36 miljoen ton druiwe lê.

In die Paarl-, Robertson-, Stellenbosch- en Worcester-streek kan boere uitsien na goeie oeste, wat beter sal wees as verlede jaar.

Teen die Oranjerivier verwag Schutte ’n kleiner oes, hoofsaaklik weens rypskade einde Oktober. Dit het 8 000 ton tot 9 000 ton wyndruiwe verwoes in die laergeleë dele oos van Upington. “Daar was gelukkig genoeg opvolgreën in die opvangsgebied om die res van die oes groot te maak.”

Boere in die Olifantsrivierstreek verwag ’n groter oes as verlede jaar. “Daar was droogte, maar die wingerde lyk beter en hulle het ’n matige somer gehad.”

Ook in die Swartland word ’n goeie oes verwag, danksy goeie reënval. Schutte het egter gewaarsku dat die wind tans moles maak in die gebied en die grondwater kan uitdroog. Opvolgreën is dus nodig.

Boere rondom Montagu, wat toegang het tot besproeiingskemawater, se opbrengste behoort die Klein-Karoo-streek se oes ’n hupstoot te gee, hoewel daar steeds droogtegeteisterde gebiede is.

Teen die Kaapse suidkus lyk die wingerde beter as die vorige jaar en die wingerde groei goed. “Ons sien vanjaar minder van die siektes wat verlede jaar ’n groot deel van die oes weggevat het.”

Die Breedekloof se oes behoort soortgelyk te wees aan verlede jaar, danksy matige somertoestande en groeikragtige wingerde.