Die uie-oes uit die Ceres- en Koue Bokkeveld-streek gaan heelwat kleiner wees as wat aanvanklik verwag is. Van 1 miljoen tot 1,5 miljoen minder 10 kg-sakkies uie kan uit die streek kom as wat aanvanklik geskat is. Die oorsaak hiervan is dat die streek ’n kouer as normale somer beleef het, sê mnr. Charl van der Merwe, die voorsitter van Korkom, die uie-kommoditeitsorganisasie in die streek.

“Ons het aanvanklik verwag om sowat 16 miljoen sakkies uie in die streek te oes, maar daar gaan beslis minder uie op die mark wees van einde Mei tot Julie.” Buiten die laer opbrengs in die Korkom-streek, gaan die uie uit die verre noorde van die land ook minder wees. Produsente in die Noordelike Uie-komitee (NUK) het in Januarie swaar reën gekry, wat die plantproses in daardie streek vertraag het. Volgens mnr. CT van der Merwe van AL 3 Boerdery en voorsitter van die NUK, het hierdie vertraging in aanplantings meegebring dat die NUK ongeveer 200 000 tot 250 000 minder sakkies uie tussen Mei en Junie sal lewer. “Teen einde Junie behoort die volume uit die NUK-streek na normaal terug te keer.” 

Pryse weer by R60?

Die afname van 1,75 miljoen sakkies uit die twee streke oor die drie-maande-periode verteenwoordig ’n geskatte 15-20% afname in volume. Van der Merwe glo die afname in produksie sal die prys laat styg. “Die koopkrag blyk vanjaar egter om minder te wees as verlede jaar. Oor die eerste vier maande van 2020 is 9,5 miljoen sakkies op nasionale markte verkoop teen ’n gemiddelde prys van R41 per sakkie oor alle grade en alle klasse. Oor dieselfde tydperk in 2021 is 9,7 miljoen sakkies verkoop, maar teen ’n gemiddelde prys van R37 per sakkie. Met slegs ’n geringe hoër volume (2%) was die prys meer as 10% laer en vandaar die afleiding dat koopkrag onder druk is.”

“In Maart was daar ’n aansienlike afname in volume op die markte weens verskeie faktore. Waar dit gewoonlik ’n toename in die prys sou veroorsaak, was daar vanjaar heelwat weerstand teen verhoogde pryse. Pryse gaan dus definitief verhoog in die volgende drie maande vanweë die laer volumes, maar dit gaan waarskynlik nie die hoogte inskiet soos in 2020, toe ons R60 en meer per sakkie verdien het nie.”