“Ons het in April maar 7,7 miljoen liter wyn uitgevoer, waar ons gewoonlik sowat 28 miljoen liter uitvoer,” het me. Yvette van der Merwe, uitvoerende bestuurder van Sawis (die Suid-Afrikaanse wynbedryfinligting en -stelsels), tydens Vinpro se inligtingsdag vir die Worcester- en Breedekloofstreek, gesê.

Vir die plaaslike mark voorspel sy ’n inkrimping van 20% in verkoopsvolumes, as die huidige verbod op wynverkope net twee maande geld.

Hoop vir uitvoer

Die bedryf het saam met die buro vir voedsel- en landboubeleid (BFAP) en die buro vir ekonomiese navorsing (BER) ’n toekomsblik op die wynbedryf gewerp. Hiervolgens is daar ’n kans dat uitvoer in die tweede helfte van die jaar voluit kan hervat.

“Die markte se reaksies is gemeng. Die deel waar wyn op die perseel verbruik word, is toe, maar buiteverkope doen goed. Die vraag is of dit sal kan opmaak vir wat ons in verbruik op die perseeel verloor.”

’n Swakker wisselkoers en Amerika se handelsbeperkings op Frankryk bring ook broodnodige sprankies hoop vir die uitvoerbedryf.

Van der Merwe sê daar is wel vraagtekens oor moontlike langtermynskade wat die uitvoerverbod kon veroorsaak het.

“Het sekere verkoopskanale dalk seergekry in die drie weke waartydens ons nie toegelaat is om uit te voer nie?”

Die wêreldwye ooraanbod van wyn en die parstyd in die Noordelike Halfrond moet ook nie uit die oog verloor word nie, het Van der Merwe gewaarsku. Tans lyk toestande gunstig vir ’n goeie oes.

“Maar daar is vrae binne die Covid-omgewing soos hoe hulle met arbeid gaan werk, want daar is kwessies met onder meer afstandhouding tussen werkers met oestyd.”

Pyn in plaaslike mark

Wat die plaaslike wynmark betref, glo sy dat herstel nie voor volgende jaar sal plaasvind nie. Die swak ekonomiese toestande sal aankope uit woede vir die regering se verbod op alkoholverkope, waarskynlik in die kiem smoor.

“Verbruikers gaan redelik knap van kontant wees. Ons voorsien nie dat plaaslike verkope vanjaar nog opgemaak gaan word nie. Ons gaan die pyn voel.”

Na verwagting gaan die vonkelwynkategorie swaarder as stilwyn getref word. Brandewynverkope kan egter groei, omdat prysverlagings as gevolg van ’n daling in produsentepryse aan die mark deurgegee sal word.