Daar kon in dieselfde uitgawe meer gelees word oor 'n oud-landdros en 'n gewese verversingsinspekteur wat hul eie kalkoenkuikenboerdery begin het. Hulle was daardie jare van die min boere wat dagoud kalkoenkuikens verkoop het.

Nog 'n interessante artikel wat in hierdie uitgawe verskyn het, het gehandel oor die bemarking van geel margarien wat verskeie boere warm onder die kraag gelaat het. Daar was egter streng beheermaatreëls daaraan verbonde, soos dat margarien nie onder dieselfde dekmantel as botter bemark kon word nie en as margarien op die houer geïdentifiseer moes word.