Waar het jy die idee vir akwaponika gekry?

Ek het as elfjarige die fliek Dolphin Tale gesien. ’n Droom om ’n mariene bioloog te word, het by my posgevat en ek het navorsing begin doen. Ek het gesien dat vishulpbronne beperk is en ál minder word.

My hart was seer toe ek besef ek sal dalk eendag nie met visse kan werk nie. Ek het op die idee van visboerdery afgekom en ondersoek begin instel oor wat dit behels en of ’n mens dit in die binneland kan doen.

Waaruit het jou eerste visboerdery bestaan?

Ná ’n akwakultuurkursus in Makhanda (Grahamstad) het ek begin met 1 000 tilapia-vissies in vier damme en ’n eenvoudige meganiese en biologiese filter. Dit was klein, sowat 40 m².

Vandag het ek vier kommersiële geriewe waaruit vier ondernemings ontwikkel het: La Pieus Aqua, Claria Sun Enterprises, Aquaponics Direct en Feed- ing Africa Unlimited.

Só lyk ’n kompakte modulêre akwaponika-eenheid: ’n Dam met visse onderaan ’n stel kweekbeddings, gevul met granietklippe waarop plante groei.

Hoe werk akwaponika?

Akwaponika is ’n simbiotiese stelsel met vis en plante. ’n Dam word gevul met water, en vis word in die dam geplaas. Die visse se uitskeiding sal die water in ’n stadium toksies maak. Die water moet dus deur ’n filtreerstelsel skoongemaak word. Dit is waarvoor die kweekbeddings gebruik word. Hulle is gevul met granietklippe wat ’n oppervlakte skep vir die groei van voordelige bakterieë.

Die water word vanaf die dam na die bakke gepomp, waar die nadelige stowwe in die water deur die bakterieë omskep word in bruikbare voedingstowwe vir die plante, wat direk in die klipmedium in die groeibakke geplant word. Daar is geen grond nie – net klip. Die plante maak in die proses die water skoon, en die skoon water gaan terug na die visdam.

Akwaponika gebruik beduidend minder water om die plante te laat groei en dra dus by tot volhoubare boerdery.

Waaruit bestaan jou Lappiesstelsel?

Die Lappiesstelsel is ’n modulêre akwaponiese ekostelsel, geskik vir stedelike gebruik. Dit beslaan 3m2. Dit bestaan uit ’n dam van 1 500 liter, wat tot 30 kg lewende visse kan huisves. Bo-oor die dam is drie groeibakke van 2 m x 750 mm. Dit is bo-oor die dam geposisioneer om die vis te beskerm en verdamping te beperk.

Die groeibakke word sonder klippe verskaf, maar alle ander toebehore is ingesluit, soos die verbindingspype en pomp. Dit is ’n 24 V-DC-pomp en kan ook met sonkrag werk. Jy kry ook ’n USB-stokkie met die installeerinligting en wenke, asook onderrig oor die gebruik van ons toepassing, Fishify.

Rikalize boer met rooi Mosambiekse tilapia- visse vir die akwaponiese stelsel, en verkoop hulle ook aan verskeie afsetpunte en plaas­like restaurante.

Wat is die voordele van die stelsel en wie kan dit gebruik?

As dit korrek bestuur word, kan ’n mens elke vier weke tot 110 gewasse oes, asook twee visse per week. Die stelsel kan ’n gesin van vier op ’n deurlopende basis ondersteun wat voeding betref en van proteïene en vars groente voorsien. Ek het die stelsel ontwikkel sodat enigeen, ongeag sy of haar vaardighede en ondervinding, akwaponika kan aanleer en voedsel produseer.

Lappies is ideaal vir private gebruik, koshuise, landelike gebiede, skole, nie- regeringsorganisasies, aftreeoorde, myngemeenskappe en klinieke. Jy kan blaargroentes soos blaarslaai, sprietuie en vrugdraende plante soos tamaties, komkommer, spanspek of selfs kruie in jou akwaponika-tuin kweek.

Wat is jou planne ná skool?

Ek sal beslis in die visbedryf wil bly, maar wil eers werkondervinding gaan opdoen by verskillende vis-georiënteerde maatskappye. Daarna sal ek ’n ingeligte besluit kan neem oor die studierigting waarby ek baat kan vind.

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op WhatsApp om daaglikse landbounuus op jou selfoon te ontvang.