Boekekuier met Maya Fowler

  • Patagonië deur Maya Fowler.
  • Uitgewer: Umuzi.
  • Prys: R220.

Tertius de Klerk vang iets onnosels aan en moet vlug uit die universiteitsdorp waar hy ’n geskiedenisdosent is — veral om van sy vrou, Alta, weg te kom. Nes sy oupagrootjie Basjan destyds, kies Tertius koers na die dorre Patagonië in Argentinië, maar hou nie rekening daarmee dat Alta haar nie so maklik gaan laat koudsit nie.

Die situasie kan anders wees, maar nes die moedige en swanger Salome destyds vir Basjan in Patagonië gaan soek het, loop Tertius en Alta dekades later byna dieselfde pad.

Die skrywer Maya Fowler vertel waarom die groepie Suid-Afrikaanse boere wat hulle in Patagonië gevestig het, haar nog altyd gefassineer het.

Wanneer het jy die eerste keer gehoor van die Suid-Afrikaners wat in Patagonië boer?

Toe ek baie klein was, het my pa vertel van ’n familievriendin in die Vrystaat, Annette Stander (née Visagie), wat in Argentinië gebore is. Ek was stomverbaas om te hoor dat hierdie boeretannie van so ver weg af kom. Teen 1938, met die eeufeesvieringe, het die NG Kerk werk gemaak daarvan om Afrikaners te repatrieer.

Só het die Visagie-gesin teruggekeer. Blykbaar het hulle nog mooi guanaco-biltong gemaak vir die reis, maar met die aankoms moes hulle die lot in Tafelbaai stort, vanweë invoerregulasies. (’n Guanaco is ’n Suid-Amerikaanse kameel-besigheid, soortgelyk aan ’n lama.)

Al die jare het hierdie storie van Afrikaners in hierdie Spaanse land my geprikkel, en ek wou al bitter lank ’n boek daaroor skryf.

Is daar raakpunte tussen die ‘boere op die aardsdrempel’ (soos hulle in ’n dokumentêre film genoem word) en hul Suid-Afrikaanse eweknieë?

Hulle identifiseer sterk as Afrikaners, maar Patagonië, veral die deel waar hulle is, is afgeleë. Vanselfsprekend leef hulle al hierdie jare sonder kontak met Suid-Afrika. Die raakpunte wat ek gesien het, is wat hulle self sal noem “plesierigheid”, en dan die liefde vir die taal, maar ook verknogtheid aan die grond.

Maar hul grond is Argentinië en hulle bewerk dit hard. Die gemeen- skap met wie ek in verbinding was, boer. Dis glad nie ’n maklike bestaan nie. 

Een van die sentrale gedagtes in die boek is dat die geskiedenis hom maar altyd herhaal. Hoe het die fuga-vorm jou gehelp om dit tuis te bring?

Die bekendste fugas is dié van J.S. Bach, en die meeste van ons het dit al gehoor sonder om noodwendig die tegniese naam te ken. In die fuga hoor ’n mens ’n tema, byvoorbeeld in ’n tenoorstem, en dan later weer in die bas. Of die toonaard verander, maar die tema bly dieselfde.

Ek voel die manier waarop mense die geskiedenis herhaal, werk baie dieselfde. ’n Mens besef nie altyd dadelik dat jy iets herhaal nie, want die “stem” (die situasie, dus) klink of lyk dan anders. Maar tog is dit dieselfde ding.

Jy skryf gemaklik in Engels en Afrikaans. waarom het jy die boek eers in Afrikaans geskryf?

Dialoog, en die “tekstuur” van Patagoniese Afrikaans, is baie belangrik in hierdie werk. Dit was vir my voor die hand liggend dat die Afrikaanse weergawe eerste moes kom, anders sou ek ál my notas en die sêgoed wat ek in Patagonië teëgekom het, eers moes vertaal!

Nog leesstof

  • Die hond wat ophou blaf deur Jo Nel.
  • Uitgewer: Penguin Random House.
  • Prys: R250.

Wanneer Izak Hugo, ’n tandarts van Port Elizabeth, sy vriend se verwurgde poedel in sy bakkie ontdek en besef daar is ’n paar uur waarvan hy niks kan onthou nie, begin hy sy greep op die werklikheid verloor. Boonop vermoed ’n bende hy het een van hul jong lede vermoor.

Izak vlug Transkei toe saam met ’n goeie vriend, maar dis daar waar sake ernstig begin ontspoor in dié sielkundige riller met ’n onvoorspelbare ontknoping.

  • Truitjie roer my nie deur Schalk Bezuidenhout.
  • Uitgewer: Queillerie.
  • Prys: R220.

Een van Suid-Afrika se gunsteling-komediante, Schalk Bezuidenhout, en sy “kreatiewe klankbord”, Erns Grundling, skryf saam-saam oor hul wedervaringe op feeste, klein dorpies, agter die verhoog en natuurlik Schalk se grootwordplek, Kempton Park. Ja, verwag om baie en lekker te lag. En wees maar gewaarsku, Schalk-hulle skrik nie vir vloekwoorde nie.

  • Wrok deur Beyers de Vos.
  • Uitgewer: Penguin Random House.
  • Prys: R250.

Wanneer Freya se tweelingbroer, Ben, vermoor word, kom sy agter sy het toe nie alles oor hom geweet nie. Die hardwerkende speurder Nolwazi, wat sy moord ondersoek, word gepootjie deur die stelsel en korrupte kollegas. Dan is daar Abraham Oktober, wat op die oog af soos ’n doodgewone gesinsman lyk, maar alles is ook nie heeltemal pluis daar nie.

En Slick, die dwelmhandelaar, vir wie mag en vergelding hand aan hand gaan. Die vrae bly terg: Hoekom is Ben dood, wat van geregtigheid, en is vergelding ’n oplossing?

  • Die Lucky Strike deur Steve Hofmeyr.
  • Uitgewer: Zebra Press.
  • Prys: R200.

Die Sluiper se dae as huurmoordenaar is nie, soos hy gehoop het, agter die rug nie. Sy verlede het hom ingehaal en wag op ’n wildplaas in die Kgalagadi en iewers tussen die botsende faksies in die Kongo. Dáár wag ’n web van verraad en misleiding op Die Sluiper.

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.