1 ui, gekap

30 ml olyfolie

15 ml sout

30 ml kerriepoeier

20 ml borrie

3 ml elk fyn gemmer, fyn kaneel en fyn komyn

3 lemmetjieblare, baie fyngekap

2 kg maalvleis

60 ml bruinasyn

50 ml elk blatjang en gladde appelkooskonfyt

3 eiers, geklits

Bolaag

250 ml koekmeel

5 ml bakpoeier

Knippie sout

10 ml suiker

125 g bevrore of yskoue botter

250 ml gerasperde cheddarkaas

3 appels, geskil en in dun skyfies gesny (jy kan ook ’n blikkie tertappels gebruik)

Braai die gekapte ui in die olyfolie. Voeg die sout, al die speserye en fyngekapte lemmetjieblare by en braai dit saam tot geurig. Voeg die maalvleis by en braai vir ’n paar minute.

Voeg die asyn, blatjang en appelkooskonfyt by. Verhit tot kookpunt en prut saam tot gaar. Verwyder van die hitte en laat effens afkoel. Voeg nou die geklitste eiers by en skep die mengsel in ’n gesmeerde oondbak.

Voorverhit die oond tot 180 °C. Vir die bolaag, sif die meel, bakpoeier en sout saam in ’n mengbak. Voeg die suiker by en rasper die botter grof by die droë bestanddele in.

Vryf die botter met jou vingerpunte by die meelmengsel in tot dit krummelrig lyk (daar kan maar groterige stukkies botter in die mengsel wees).

Voeg die gerasperde kaas by en meng deur. Pak die appelwiggies op die vleis en strooi die bolaag eweredig oor. Bak vir 40 minute tot die bolaag goudbruin is. Sit die bobotie voor met rys en droëvrugte-compote.

Lewer 10 porsies

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.