’n Bak dik ertjiesop met rafeltjies sagte, sout skenkelvleis en ’n sny warm soetsuurdeegbrood met plaasbotter om daarby te eet, is op my toptienlys van lekkerste etes. Of wat praat ek?

¦ 250 ml droë-ertjies

¦ 2 liter water, plus ekstra

¦ 1 middelslag gerookte varkskenkel

¦ 2 uie, grof gekap

¦ Sout en vars gemaalde swartpeper na smaak

Sit die ertjies in ’n groot kastrol saam met die water, skenkel en uie. Verhit tot kookpunt en prut baie stadig vir 3 tot 3½ uur, tot die ertjies ’n puree en die vleis baie sag is. Skep die vleis uit, trek die vel af en trek die skenkelvleis met ’n vurk van die skenkelbeen af.

Vlok die vleis (of sny in stukkies) en skep terug in die soppot. Voeg ekstra water (of ’n klein bietije vleisaftreksel) by as die sop te dik raak. Geur mildelik na smaak met sout en peper en sit warm voor. Lewer 6 porsies.

Kombuiswenk

As jy met droëbone, -lensies of -ertjies kook, moenie die gereg met sout of iets suurs (soos asyn of wyn) geur voordat dit nie heeltemal sag gekook is nie. Sout en sure maak die buitekant van droë peulgroente hard en verleng die kooktyd aansienlik.