Sjokoladebroskors

  • 180 ml koekmeel
  • 1 ml sout
  • 80 ml kakao
  • 100 g botter, in klein blokkies gesny
  • 100 ml strooisuiker
  • Paar druppels yswater

Karamel

  • 250 ml witsuiker
  • 45 ml water
  • 15 ml goue- of esdoringstroop
  • 45 ml room
  • 100 g botter
  • 3 ml sout
  • 30 ml whisky of brandewyn

Sjokoladebolaag

  • 100 g donker sjokolade, gekap
  • 100 ml room
  • 5 ml botter
  • Gekrummelde fudge of fyngekapte neutlekkers (pralien), om te versier (opsioneel)

Deeg:

Sif die meel, sout en kakao saam en vryf die botter daarby in. Voeg die strooisuiker by en meng goed. Voeg ’n paar druppels yswater by en maak aan tot ’n deeg. Bedek met kleefplastiek en verkoel vir 20-30 minute.

Rol die deeg uit op ’n meelbestrooide oppervlak en voer ’n tertbord van 24 cm daarmee uit. Prik die tertkors met ’n vurk en verkoel vir ’n verdere 20 minute, terwyl die oond voorverhit word tot 180 °C.

Bak die tertkors vir ongeveer 20-25 minute tot heeltemal gaar. Verwyder uit die oond en laat afkoel.

Karamel:

Verhit die suiker stadig in die water oor lae hitte, terwyl stadig geroer word, tot die suiker heeltemal opgelos is. Verhit tot kookpunt en laat kook tot ’n diep karamelkleur.

Verwyder dadelik van die hitte en voeg die stroop, room, botter, sout en whisky of brandewyn by. Klits goed tot ’n gladde sous. Sit die kastrol terug op die hitte en laat kook vir nog ’n paar minute. Giet die karamel in die gaar tertkors en laat staan vir minstens 1 uur voor dit in die yskas gesit word, tot die karamel gestol is.

Sjokoladebolaag:

Verhit die sjokolade en room stadig oor lae hitte, terwyl aanhoudend geroer word, tot glad en gesmelt (of verhit dit teen 30% krag in die mikrogolf en klits liggies tot glad). Roer die botter by die warm sjokoladesous. Laat effens afkoel en giet die sjokolade egalig oor die karamellaag. Laat staan tot gestol.

Bedek en verkoel tot benodig, maar haal die tert minstens 40 minute voor dit bedien moet word uit die yskas sodat die karamel sag kan word. Versier met gekrummelde fudge of fyngekapte neutlekkers, indien verkies. Sit dun skyfies van die tert voor saam met goeie koffie.

Lewer 16 porsies

Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.