As die snoek loop, is klein snoekboboties met klappermelk of karringmelk in die vla-bolaag op die Oos Wes-restaurant se spyskaart. As daar vars mossels uit Saldanha kom, word elke bakkie versier met drie gestoomde mossels in die skulp. Somermaande sit Stefan dit voor met geroosterde steenvrugte soos appelkose of perskes, in plaas van blatjang.

1 ui, gekap

1 knoffelhuisie, gekap

12,5 ml kerriepoeier

5 ml borrie

’n Paar takkies pietersielie en tiemie, gekap

1 rooi brandrissie, fyngekap

1 middelslag-wortel, fyngerasper

750 ml gevlokte vis

Sout en peper na smaak

1 dik sny witbrood, gedoop in 250 ml melk

Sap van 1 suurlemoen

2,5 ml neutmuskaat

15 ml bruinsuiker

1 eier, geklits

Gaar mossels vir opdiening (opsioneel)

Bolaag

250 ml karring- of klappermelk

2 eiers, geklits

30 ml fyn blatjang (opsioneel)

Sout en peper

Suurlemoenblare

Gevlokte amandels

Voorverhit die oond tot 180 °C. Braai die ui en knoffel sowat 5 minute in ’n pan, voeg die kerriepoeier en borrie by en braai nog ’n minuut. Sit dit in ’n mengbak. Voeg die pietersielie, tiemie, brandrissie en wortel by die uiemengsel. Vlok die vis in klein stukkies en voeg dit ook by die uiemengsel. Geur met sout en peper.

Druk die oortollige melk uit die brood en meng die brood saam met die suurlemoensap, neutmuskaat, bruinsuiker en eier goed by die vismengsel in. Skep in ’n gesmeerde oondskottel of 4-6 klein bakkies. Maak gelyk bo-op.

Bolaag: Klits die karring- of klappermelk, eiers, blatjang, sout en peper saam en giet dit oor die bobotie(s).

Rol suurlemoenblare soos sigaartjies op en druk dit plek-plek in die bobotie(s) in. Bak vir 35-40 minute. Strooi gevlokte amandels oor en pak ’n paar gaar mossels bo-op. Eet saam met witrys.

Lewer 4-6 porsies