Die meeste Suid Afrikaners weet teen hierdie tyd dat die aandeelprys van Steinhoff International Holdings (Steinhoff) die afgelope twee weke met meer as 80% gedaal het.

Die maatskappy se ouditeure wou blykbaar nie afteken op die jaar se finansiële state nie. Sommige mense maak aantygings wat wissel van manipulasie van verdienste tot ’n buitengewone hoeveelheid oornames wat gedoen is om die maatskappy se aandeelprysprestasie te ondersteun.

Dan ondersoek die Duitse owerheid ook sedert 2015 die maatskappy se belastingsituasie. Sommige batebestuurders het ook gewonder hoe die maatskappy ’n aansienlik laer effektiewe belastingkoers as mededingers kon handhaaf.

Gevaarligte
Hoe is dit moontlik dat almal die gevaarligte misgekyk het? ’n Maatskappy se ouditeure is onder meer daarvoor verantwoordelik om toe te sien dat finansiële state ’n akkurate weerspieëling van die werklikheid is. Aktiewe fondsbestuurders ontleed ook maatskappye se finansiële state en die industrie en selfs die bestuur van maatskappye word ondersoek – tog het die meeste fondsbestuurders die risiko by Steinhoff misgekyk.

Wat is die werklike waarde van Steinhoff? Dit is moeilik genoeg om die intrinsieke waarde van maatskappye in normale omstandighede te bepaal. Die oudit wat deur ’n ander ouditeursmaatskappy op Steinhoff gedoen gaan word, moet eers afgehandel word voordat daar meer duidelikheid oor die situasie verkry kan word. Die moontlikheid van laste wat nie op die balansstaat vertoon word nie, word blykbaar ook ondersoek.

Riskante belegging
’n Ontleding wys dat Steinhoff se aandeel in Steinhoff Africa Retail Ltd (die maatskappy waarin onder meer Pepkor gehuisves word) en PSG meer as R10 per Steinhoff-aandeel uitmaak. Teoreties behoort Steinhoff se aandeelprys nie laer as dit te verhandel nie.

Dit is natuurlik moontlik dat die res van die maatskappy meer skuld as bates kan hê, wat die R10 per aandeel kan laat krimp. Wanneer die nuwe onafhanklike ondersoek voltooi is, sal dit meer lig hierop werp. 

Hoewel dit ’n baie riskante belegging is, blyk dit dat daar reeds nuwe beleggers is wat klein hoeveelhede Steinhoff-aandele begin koop.

In slotsom is Warren Buffet se raad sekerlik die beste: As ’n maatskappy se sake óf ’n belegging nie verstaan word nie, moet dit liefs vermy word.

Edwin Smit is ’n portefeuljebestuurder by BVG Financial Solutions, ’n gemagtigde finansiëlediensteverskaffer van die FSB, met lisensienommer FSP 39889, en ook ’n geregistreerde finansiële / Yield-X handelaar op die JSE by BVG Commodities (lid van die JSE). Hy praat Maandagaande om 18:45 op RSG Geldsake. Sy kontakbesonderhede is tel. 012 484 4013 of e-pos: edwin.smit@bvg.net.

Die volgende dienste word gebied:

* Wisselkoersverskansing op BVG se Yield-X-lisensie (JSE). Lesers kan inteken op die daaglikse valutaverslag.

* Die ruil van fisiese kontant met die samewerking van Absa en Investec: Omskakeling van rande na dollars, euros en ponde, en omgekeerd.

* Aandele-portefeuljebestuur met die samewerking van Momentum SP Reid Securities. Lesers kan inteken op die daaglikse aandeleverslae.