’n Entstof wat beeste en sommige wildsoorte teen snotsiekte beskerm, kan binne die volgende drie jaar in Suid-Afrika beskikbaar wees.

Dit net as die staat nie te lank sloer met die registrasieproses nie, het dr. Peter Oberem, voorsitter van Wildbedryf SA (WRSA) en besturende direkteur van Afrivet, op die kongres van Limpopo se Rooivleisprodusente-organisasie (RPO) in Mokopane gesê.

Oberem het gesê Afrivet het reeds toestemming verkry om ’n geïsoleerde en verswakte virus vanuit Skotland na Suid-Afrika te voer vir die ontwikkeling van ’n plaaslike entstof.

Hy is vol vertroue dat die entstof so goed vir plaaslike diere sal werk as wat dit in die Moredun-navorsingsinstituut in Skotland gewerk het. Die oorspronklike virus wat Moredun geïsoleer en verswak het, is uit Oos-Afrika afkomstig. Oberem sê daar bestaan geen bewyse dat die plaaslike snotsiekte enigsins van dié in Oos-Afrika verskil nie.

“Ons wag nou net om die volledige resep vir die vervaardiging van die entstof te kry en al die gepaardgaande inligting sodat ons ’n finale proefprogram kan optrek en goedkeuring kan kry,” het Oberem gesê.

Dié proewe sal by die Onderstepoort-instituut vir veeartsenykunde gedoen word en behoort nie langer as ses maande te duur nie, daarna kan registrasie twee tot drie jaar duur.

Die WRSA gaan net meer as R1 miljoen bydra tot die finansiering van die ontwikkeling van die entstof. Die res van die koste sal deur Afrivet gedra word wat dan later die alleenverspreider van die entstof sal wees.

Oberem hoop dat so ’n entstof vrede tussen wild- en beesboere sal bewerkstellig nadat dit onlangs aan die lig gekom het dat beesboere se verliese weens snotsiekte meer as R5 miljoen per jaar beloop.

“Ons as wildboere het aanvanklik gedink ons kan ’n trust op die been bring waardeur ons dan beesboere vir hul verliese kan vergoed.

Ons het onder onsself meer as R1 miljoen ingesamel, maar besef nou dit is ver te min. Daardie geld word nou in die entstof-ontwikkeling ingeploeg in ’n poging om ons medeboere te beskerm.”