’n Boer en twee vrywillige brandbestryders is tydens die brande beseer, terwyl sowat 500 bale voer, ’n stoor en 13 800 ha se weiveld afgebrand het.

Mnr. Johann Breytenbach, hoofbestuurder van die Vrystaatse sambreel-organisasie vir brandverenigings, sê drie brande was veral moeilik om onder beheer te bring.

Dié drie brande het by Vredefort, Koppies en Virginia voorgekom.

“Warmer toestande en sterk winde van tot 55km/h het toestande geskep wat die brande aangevuur het en vinnig laat versprei het,” sê Breytenbach.

In die distrik Koppies het 4 560 ha se weiveld afgebrand. Verskeie geboue is ook in dié brand verwoes, en ’n plaasskool is erg beskadig. “Volgens aanvanklike inligting het dié brand ontstaan weens ’n arbeidsdispuut, maar geen verdere inligting is nog in dié verband beskikbaar nie,” sê Breytenbach. 

'n Veldbrand woed by Koppies in die Vrystaat. Foto: Vrystaatse sambreel-organisasie vir brandverenigings
'n Veldbrand woed by Koppies in die Vrystaat. Foto: Vrystaatse sambreel-organisasie vir brandverenigings

’n Boer is ernstig beseer in die brand wat tussen Vredefort en Viljoenskroon voorgekom het, terwyl 2 440 ha se weiveld verwoes is en 40 skape, 29 boerbokke en verskeie stuks wild dood is. Sowat 6 800 ha het in die distrik Virginia gebrand weens ’n vuur wat glo ontstaan het by werkers se huise op ’n plaas. Twee persone het ligte beserings opgedoen, terwyl ’n bakkie en stoor beskadig is.

Brandseisoen in volle swang

Breytenbach sê die brandseisoen is in volle swang, en weerstoestande wat tot wegholbrande kan lei word van vroeg die week af in die provinsie ondervind weens die koue front wat oor die land beweeg.

“Die ergste brande kom voor wanneer frontale stelsels oor die provinsie beweeg. Dié stelsels veroorsaak sterk winde uit die noorde, wat stelselmatig na suide verander soos wat die stelsel oor die provinsie beweeg.”

Die winderige toestande, asook die feit dat die omgewing droog is en dus vinnig vatbaar is vir brande, veroorsaak dat brande vinnig versprei en teen ’n erge intensiteit brand. Hy vra boere, landelike gemeenskappe en die publiek om uiters waaksaam te wees in dié toestande.

Breytenbach doen ’n beroep op álmal om sover moontlik nié oop vure te maak nie, en om ook nie sigaretstompies in die veld te gooi nie.