Beweringe van ’n moordlys met die name van plase wat in Trompsburg aangeval sou word, is uiters onstellend, sê Vrystaat Landbou (VL).

Dié bewerings is Vrydag, 25 Okotber 2012, in Volksblad gepubliseer as deel van ’n berig oor drie verdagtes wat verdink word van die moorde op mnr. en mev. Johan en Cecile Fourie van die plaas Knoppe naby die dorp. Die verdagtes het verlede weer in die hof verskyn.

Volgens die berig is dit nie duidelik of die beweerde lys met ’n bende, Izinyoka (die Slange), verbind kan word nie. Die drie verdagtes, mnre. Moeketsi Hlassa, Nkululeko Mvumvu en Phinias Mothibi is glo deel van dié bende.

Polisie ondersoek die 'lys'
Mnr. Dan Kriek, voorsitter van Vrystaat Landbou, sê die beweringe van die lys word deur die Polisie ondersoek om uitsluitsel te gee oor die egtheid van die bewerings. “Nog geen klinkklare bewyse bestaan dat so ’n lys bestaan of dat dit met die moorde verband hou nie. Ons maan die gemeenskap om kalm te bly en herinner hulle om ten volle deel te neem aan ons veiligheidstrukture, soos boere reeds doen.”

Kriek sê voorlopige ondersoeke deur die organisasie se veiligheidstrukture, by name mnr. Hennie Gerber, kon geen bewyse bied dat die lys bestaan of met die moorde verbind kan word nie. Hy sê verdere in diepte ondersoeke word wel onderneem, weens die ernstige lig waarin die VL die bewerings beskou. Met behulp van dié ondersoeke wil hulle die juistheid, maar ook die oorsprong van die bewerings, bepaal.

Kriek het ook die hoop uitgespreek dat die ondersoek so spoedig moontlik afgehandel sal word en dat die bevindings met die gemeenskap gedeel sal word.

Die drie verdagtes se saak is tot 6 Desember 2012 uitgestel.

Bron: Volksblad